تسجيل الدخول

مشاهدة النسخة كاملة : وقت الاثاره


عناد الرواد
21-09-09, 02:18 AM
هيضتني واضحكتني بالعباره
ما ينحلب ثور ٍ بسلم الحكيمين

البعض يحسب هالتفلسف شطاره
والبعض ما يوحي كبير العناوين

الطيب سنه يا رجال الجساره
ولى الردى من وين ما تبخصه شين

أي شي لو جينا وزدنا عياره
يخرب ولا ينفع بكل المضامين

ولو ان كل الناس فيهم نماره
ما شفت بالدنيا رجال ٍ رديين

حتى التجاره بين ربح وخساره
وسلك الحياه يمشي على العسر واللين

يازين شب الضو عقب الصفاره
ونجر ٍ يجظور للعرب والبعيدين

احمس ألين البن يغدي شقاره
شقار خيل ٍ زبنوها الميادين

فنجال اشقر زايد ٍ في بهاره
هيل ٍ حشم والبن نقوه من الزين

ما هي اقهوة ٍ يطبخنها العذاره
ولا لا مست ياخوك زفر المواعين

انا اشهد الفنجال يجل المراره
لا صار قدره وافيا ً بالموازين

عده عن اشباه الرجال الحقاره
وصبه لبن عمران ريف الضعيفين

واسلم وسلملي وهات البشاره
آخير من دنيا بها الناس لاهين

هو ما ذبحنا غير سو الاداره
ونقول نفهم ! ويننا والفهم وين

تاره نجر الهم ونصيح تاره
وتاره نقزرها وحنا بريين

اما تظل احلامنا فالصداره
ولا بلاش احلام وانام حافين!!

ولى نعيش العمر فوق المناره
ولى حياه تدعي عليها المساكين

كله على شان العصر والحضاره
ولى عشان انكون بالحيل راقين

مدري قطعنا قبل فتح الاشاره
ام هل اتى دهرا ً على الناس من حين

ما شفت اقسى من قلوب الحجاره
اللي يقلطون البراءه قرابين

والنار ما تولع بليا شراره
لكل شي اسباب يا دمعة العين

قفا ابو زيد الهلالي وكاره
والكار ديس وبيع وسط الدواوين

بعض العرب يصدمك بأخر قراره
خلاص لتناقش ولا تسأله وين

وبعض العرب تلقى براسه نعاره
طيِب وابن عيله وربعه عزيزين

والله ما يحتاج منك اشاره
يقلطك فالبيت لو الشحم دين

وبعض العرب عكسه وعلى غراره
مايلد في وجهك تقل ماكل ٍ طين

لو تبعده مترين عن باب داره
الا يضيع ويفقدنه النساوين

يا وين ابلقى من يحشم وقاره
اللي كلامه بالمجالس رياحين

اللي يكرم الضيف ويعز جاره
اهديب شام واجودي خطل الايدين

فالخاسر اللي زاد نفسه خساره
والرابح اللي يتبع الحق والدين

ولى ترى هذا زمان الاثاره
لا قيل عطران الشوارب مقفَين

الطير وكري يا طيور الحباره
شلوى هفت بالواد من عدت اسنين

من يوم ما قفت خيول الزباره
وشفنا الكدايش يسبقن يالله اتعين

الله واكبر يا زمان الدشاره
إيهب وجه القرن واحد وعشرين

ماقول انا باعيد دورة مساره
ولا بجمع الذرات ولا بقطع الجين

كل واحد ٍ عارف يمينه يساره
بس الوكاد الوقت ما فيه ثنتين

اما انا قد جيت وقت الاثاره
ولى الاثاره جت والناس مقفين!!!

عضوو موقوف
21-09-09, 02:41 AM
صح لسااااااانك

دمت مبدع شاعرناااا

الله يعطيك الصحه والعااااافيه

أحمد الزمهري
21-09-09, 11:32 AM
كبير والله كبير
صح لسانك أذهلتني بصراحة


لك تحياتي

الفارس
21-09-09, 06:20 PM
شاعرنا القدير وسيع الطعنة
نص ابداعي جزل من جزل
و قد اذهلني بروعة معانيه و فخامته
فهل أنت اخي الشاعر عناد الرواد ؟
ننتظر ردك مع اجمل التحيات
و كل عام و انتم بخير

عناد الرواد
22-09-09, 05:30 AM
تحدوه البشر

احمد الزمهري

الفارس

لا هنتم حضوركم اجمل

غمرتني بلطف ونبل مشاعركم

والله يجملنا

اخوكم عناد

عناد الرواد
22-11-09, 05:40 PM
لا هنتم ودمتم سالمين

نديم الشمال
22-11-09, 05:52 PM
الطيب سنه يا رجال الجساره
ولى الردى من وين ما تبخصه شين

الكبير كبير:والشعـــــــر الجزل يفرض نفســـــــــه شئنا أم ابينا

نشكرك ونشكر شقيقك الشاعر الكبير عناد الرواد

فعلا من عيون الشعر وفقكم الله وأنار لكم الطريق

تحياتي