عشان لا تنطح شياهك شياهي

[عناد الرواد]

عشان لا تنطح شياهك شياهي
كل المشاكل تنتهي بالهداوه

منتا مذكرني ولانيب ساهي
ولانتا على قلبي تحط الغشاوه

يا جار كيف الحال والحال زاهي
عسى حياتك في نعيم وحلاوه

يوم المرى جتنا بصوت(ن) تهاهي
عيب الغلط في الحاضره والبداوه

انا بلايا جار ما هو فكاهي
عبس الحجاج ولا يعرف الطراوه

يا جار خل الامعه والسباهي
شورك براسك من يلاويك لاوه

يا جار عمر الطيب ما صار واهي
لك عندنا تقدير فوق الحفاوه

قضيت ليلك بالشيش والمقاهي
ومشيت لدروب الجهل والعماوه

لاتطاوع الحرمه وعبد الالهي
من طاوع الاثنين ما به نداوه

ياكثر ما تحت السواهي دواهي
وياكثر ما بالارض حقد وعداوه

وكم جار بيت (ن) ضاع دربه وتاهي
ولا يدل غير المحكمه والدعاوه

وكم واحد(ن) مرتاح والجيب راهي
وكم واحد(ن) ذاق العنا والقساوه

وكم واحد(ن) منا عن الدين لاهي
واليا فطن يفطن لبعض الفتاوه

لا يامر بمعروف ولاهوب ناهي
ولا يخرج إمن المال حق الزكاوه

زين له الشيطان كل الملاهي
ورافق رخوم(ن) كل ابوهم افلاوه

تلقاه في وسط المجالس يباهي
وده عيال الناس تنصاه خاوه

اللاش والملاش دايم يضاهي
يا حب قلبه للجدل والملاوه

لا شفتها كثرت عليك النواهي
خل منزلك بين الهدى والنقاوه

خلك على وضع الحذر بنتباهي
والضرس لا سوس على طول داوه

ولابد ما يرجع مسار المياهي
وكل المشاكل تنتهي بالهداوه

[نديم الشمال]

ههههههههههه

من طآع الثنتين (اقرا عليه الفاتحه والتحيآت بعد)

صح لسآنك ياعنآآآآآآآآآآآآد

[طير السعد]

صح لسانك ياعناد ولاهنت
جزله من راس جزل
تحياتي

[الشاعر معشي الذيب]

لا شفتها كثرت عليك النواهي
خل منزلك بين الهدى والنقاوه

خلك على وضع الحذر بنتباهي
والضرس لا سوس على طول داوه


انشهد انك فارسٍ فوق راهي = شاعر ومثلك يستحق الحفاوه
يفداك منهو لاجلس دوم فاهي = علمه قليل وكل ربعه فلاوه

انت ياعناد شاعر اتيت في زمن غير زمانك ومثلك يستحق الصداره اين ماحل
دمت ودام نهرك المتدفق بكل هذه الدرر الثمينه

[ياسردياب]

الشاعر عناد الرواد
الشاعر هو من يجعل القصيدة تكتب نفسها وانت هكذا
اسجل اعجابى بما افضت وذكرتنى بما قد كتبته عن هيكل

مهد للقصيدة حتى تقتحم كل القيود بلا خوف
ياسر دياب الحويطى
من شعراء الأقاليم
مصر