كما تدين تُدان / على الهلالي الطويل

[عناد الرواد]

مانيب هالمجلس مصاهل طويل لسان
ولاني مسولف للرياجيل دون بيان

اللي سمعني ما قضب أي زلّة ٍ
أرتّب المعنى بمعنى عليه ضمان

كثر الحكي ميجيب كود المجادله
والصمت حكمه يستر العارفين امان

اشوف لي ناس ٍ تشدّق بهرجها
تطلق لسان ٍ لا شكيمه ولا عنان

في كل مجلس سامرين ٍ على اللغا
أكّالة الميّت وتحفر قبور زمان

نهاشة الاعراض دوّارة الحكي
نوب ٍ مطافيق ٍ ونوب ٍ تشن اذان

قذّافة المحصن وبوّارة العهد
نهّاشة الطرقي تبي تاخذه رهان

قد قال ابن فالح لمن يشتري الحكم
احفظ شرف نفسك مثل ما تدين تُدان

اللاش والملّاش والصاحب العفن
جنّب امخاشرهم ولتجي لهم مكان

اللي يشبوّن الوريّه بلا سبب
امنافقين امداهينين العرب دهان

احفظ لسانك واحترز من عواقبه
ترى اللسان احصان لا صنت به تُصان

وان كنت في عرف الرياجيل مبتحل
دور على اهديب المناعير من حصان

من صربة ٍ فكّاكة الضيق والنشب
لطّامة الطابور وامخضبين سنان

مركاضهم يشبع به الذيب والنسر
منزالهم لا شمّلوا ديرة ٍ يبان

النيب ظاعنة ٍ ولا من يريعها
اوسومها رمح الرديني عليه لجان

أورنس وسمّها واطلق اعقالها
من ديرة الطربوش إلى نجدهنّ أمان

لو يلمس العطشان دافي ديودها
تعطيه من صافي لبنها تدر حنان

مرحوم يا سيف المراجل وتاجها
يا جعل تجري من تحت قبركم جنان

[مطلق العيد]

صح لسانك

وسيع

دائماا مايشدني هذا البحر الجميل

تحياتي لك