سبير علاق

[عناد الرواد]

يابو حمد صدري شمالي الى ما ضاق
ودي بقفقاف ٍ تزوزى حباريه

يم الديار اللي هواها من الاعماق
ماتنمسح من ذكرياتي وهي حيّه

الجيب جيب اللي سبيره على علاّق
مربوط بنتل للديار الشماليه

مقناص من كثرة همومه وباله ضاق
وده يفضفض للحماد ومفاليّه

فرخ ابيض ٍ كامل مسرول شليل الساق
ماخذ من القرناس هيبة مواريّه

مابه نديش يصفط الريش طاق بطاق
راسه قطن والعين فنجال يا ويّه

اللي مشاويله بكفه تقل مغلاق
لا هد إخذ والربد ضاعت هقاويه

كفخة جناحه كنها مقرض الحلاق
واطرافها سيفين قصّت ثناديه

لا مشّ وجه القاع يلطم وهو صفاق
واليا درع بالحوم تدحم مواميه

جثل الثنادي والمناكب مهنّ بدقاق
ابيض طويل ٍ عاتقه عن علابيّه

رويان ريشه من براد الهوى لا راق
عليه بشت الثلج واالعين شبريه

في خايع ٍ ماجاه راعي ولا سبّاق
فيه الغضا والشيح والحان قمريه

وآقند الفنجال واتعب على الترياق
لين اتغدي كل الخواطر رياضيه

من قمة الهادي لقمة طويل اشهاق
صدري فتحته للهوى والوساميه

سوقي قنوفك وارزمي لين ما ينطاق
دكّيه بنواع الغيوم الركاميه

وامد شوفي واحضن المزن والبرّاق
يابوحمد مدري متى نعلن الجيه

يوم البدو شدوا وهدهم يبون فراق
واقلوبهم تشره على ريحة الميه

لين الحيا يحيي ديار ٍ لها نشتاق
وانعودها واندّله النفس والنيه

[الدحمي]

صح لسانك ..اخوي عناد .. الحقيقه هيضتنا الله يسامحك .. :)

وفالك جيب لكزس يعفيك عن شوف البناشر .. وشيل وحط بهالاسبير ..:D


دمت بود ..

[عناد الرواد]

لا هنت يالدحمي

[نديم الشمال]

صــــــــــــــــح لســـــــــــــآنكــ يالرويلي

وطلبآتك في شبكة الحويطآت آوامر (حق الضيف الكرامه)

وانت لحيه غانمه واللحيه الغانمه نكرمها

((طلبك تم وانا اخوك ))

تحيه من القلب للقلب

[عناد الرواد]

بيض الله وجهك

يا النديم الكريم