نكبة حزيران

[الأفق]

البـارحـه مـا نمـت بـالـليـل سهــران=عـيني سهيـرة والمخاليـق غـافيـن ‏

والـقلـب هـام وهـيـمه كثـر الأحـزان=يخفـق كما يخـفـق طليق الجناحين

قـلـب العـنـا مـا لاق والفكـر حـيـران=روابعـه تـزداد مـن لـوعـت البـيـن

أهرف كما يهـرف مع الـدو سرحـان=وأعول كما تعـول خلوج المقاطيـن

ونـيـت ونـت مـن دخـل بـاب سـجـان=أو ونـت الـلي طاح قـدم المـثاريـن ‏

قالوا علامك يا عسى ما انت وجعـان=قـلـت آه عـلي ما لـقـوه المـداويـن

شكـوى ضميـري قلتهـا سـر واعلان=من جـرب الـفـرقـا يشوف الأمرين

مـانـي سقـيـم الـحـال لاشـك هـويـان=وأهـل المحبـه بـالهـوا دوم شاقيـن

قـلبي غـدا يـا نـاس بالوجـد هيـمـان=داي ودواي وعـلـتي داعـج العـيـن

عـزاه يـا قـلبي عـلى الـزيـن ولهـان=غديـت مثل الـلي وقع بيـن نـاريــن

الـلـي فـتـني نـاعس الطـرف فـتـان=زيـن الحلايـا كامل الحسن والزيـن‏

زوله كعـود الحـور أو مطـرق البـان=يلعـب بـه النفنوف وسـط البساتين

والـجـيـد كـنـه جـيـد عـنـود غــزلان=قـادت خشوف الريم بين الصعانين

غــر الـثــنـايـا كـنـهــن حـب رمـــان=وكـن الشفـايـف لا تـبسـم قـياطيـن

‏ والقرن الأشقر فوق نحره والأمتان=يضفي على اللي كنهن ناعـم التين‏

‏ كان ارتدا مـن زاهي اللبس فستـان=مثـل البـدر وأن طـل بيـن الميازيـن‏

خـلي سقـانـي بـالهـوى سـم ثـعـبـان=حـبـه طعـني بالحشى بـغيـر سكيـن

أرجوه رجـوا البـدو لهطول الأمـزان=كن الشهـر بفراق الأحباب حوليـن

عنيت لـه مشتاق من عقـب هجـران=يـا مـا ذكـرتـه والمخـالـيـق لاهـيـن

يطري علي الزين فـي كـل الأحـيـان=وأطريه بين الحين والحين والحين

عـلـيـه قـلـبي دايـم الـدوم عـطـشـان=كـنـا ولا زلـنـا عـلى العـهـد باقـيـن

ما أظـن يمحى حـبنـا طـول الأزمـان=ولا أنساه ما دامت بنا الروح حيين

لفيت من غيبه عـلى الوصل شفقـان=مشفي على وصله عقب غيبة سنين

جيتـه مـن ديـار الـوديـعـة ونجــران=باغـيه بالسنة عـلى الشرع والدين

بـيني وبـيـن الـزيـن ميثـاق وأيـمـان=وعـلى الـمحـبـة يلتقـون المحبـيـن

حان الوعـد يا صاحبي واللقـاء حان=حان الوعد يا صاحبي والوعد دين

كانـك عليـه يا أريش العيــن زعـلان=العـفـو لا تـسـمـع كـلام البغـيضيـن ‏

تذكـري صـدق الوفـاء قـدر الإمكـان=غـالي وأقـول أغـليـك لو ما تغـليـن

وأن كنـت يا خـلي نسيت الـذي كـان=أعـطيـك عـن حـبي دليـل وبراهـين ‏

لاشـك أظـن القـصـد يـا زيـن نكـران=من غـير مـا تلفـظ قريـت العناويـن

بـادرتـني عـقـب الـمـودة بـجـحــدان=وأنكـرت حبي يا هنـوف المـزاييـن

قالـت ظـلمت وكـل مـا قـلـت بـهـتـان=بيني وبـينك ما أتذكّـر جـرى شـين

والظاهـر أنـك يا فتى الجود غـلطـان=وأظـن هـرجك كـل ما قـلت تخميـن ‏

أترك مجال الهرج من غيـر خصران=لا لا يغــرك يـوم أحاكـيـك بـالـلـيـن

أنـا عـفـيـفـة مـا تشـقـويـت بـنـسـان=ولا ني من اللي يعـاهـدن الغلاميـن

أبحـث عـن الـلي للمواثيق مـا صـان=وأعـرف مسيرك يافتى وجهته وين‏

دوّر عـلـى خـلـك ولا لـك بـنـا شـــان=مالـك ومـال الغـافـلـيـن المغــريـن

قـلـت أشهـد أن مـا للغـنـاديـر خــلان=ولا ينخدع بعهـودهن كـود مسكين

أنت البيوق اللي بعهـد الـولــي خـان=باق العهـود ولا أيعـرف القـوانيـن ‏

مـن لا بنا حبـه عـلى صلـب سيسـان=تنهـار جدرانـه مثـل حـائـط الطيـن

سحرت قلبي سحر مارد مـن الجـان=وعاملتـني يـا زيـن فـي سلم لينيـن

ونـكبتـني يـا شـوق نـكبـة حـزيـران=وغصبتني غصب اليهـود لفلسطين ‏

وعملت ضدي حق نقــض المريكـان=وعـزلتـني كعـزلـت الأمـم للصـيـن ‏

وحـكمـتني مـثـل حكـم الشـاه لأيـران=وحاربتني حـرب الجماهير0000 ‏

وجـرت عـليـه جـور تيـمـور لعـمـان=ونـفـيـتـني نـفـي اليـمـن للسلاطين

وهزمتني كما أنهـزم جيـش الألمـان=وسلمـت لـك تسليـم هـتـلـر لبرليـن ‏

يا زيـن مـا نـقـبـل مهــونـة وخـذلان=والجـور ما يـرضـاه كـود الرديـيـن

الجـور يجزع والشرف غال الأثمـان=ومن باعنـا بـدرهـم نبيعـه بقرشين ‏

خـلـك تـولـي مـثـل مـا قــال راكـــان=نشوم عـنـك ونقـتـدي بابـن حثليـن

لابـد نـلـقـا مـن العـمـاهـيـج غــدنـان=نكسب خزيـزة من رعابيب الأدنين

وقـام أيتفطن صاحـبي عقـب نسيـان=وفـكر وعـاد الذاكـره عقـب تفطين

وعض البهـام من التحاسيف ندمـان=وقال العـفـو تـوي تذكـرت هلحيـن

ونهـت ودنـق وأنقـلب وجهـه ألـوان=وبان الغضب في مسفهل الحجاجين

وهلت سكايب دمعتـه فـوق الأوجـان=وقلت أنتهت يكفي البكاء ليه تبكين

قالـت لك اللـه مـا عرفـت أنـك فـلان=ومن التغـيّر ماعرفت انت أبن مين

عجبت كيف الشيب في عارضك بان=وش الذي شيبك وأنت ابن عشرين

قـلـت الـسبـب مـا يجهلـه كـل فهمان=وأنتي سبب ما صابني كان تـدرين ‏

هـذي وقـايـع قـصـتي دون نـقـصـان=دونـتهـا فـي واقـع الشعـر تـدويـن ‏

ولا أريـد تـوضيح الحقـايـق بـقيفـان=ولا ودي أذكر ما جرى بين الأثنين

تـم الـجـواب الـلـي كـتـبـته بـديــوان=سجلت به من صافي الشعـر ستين

[الآتي الأخير]

اخي المبدع الأفق
اشكر لك اشراكنا في قراءة هذا النص
فهذه ليست قصيدة و انما ملحمة شعرية متكاملة اتسمت بالجزالة و الصور الشعرية النادرة
و المشاعر الفياضة التي لمستها كمتذوق و كأني اعيش الحدث و ملحمة الوداع
و التي اختلط بها الوجع الذاتي بأحداث مرت بها الأمة و كأن الشاعر يسقط معاناته على احداث دامية جرت .
هذا النص فيه خليط عجيب و امتزاج محبوك زاده بهاءا و رونقاً
صدقني اخي الأفق هذا النص استوقفني كثيرا و اذهلني كثيرا بمفرداته الغارقة حد الثمالة في الجزالة الاعجازية
التي ينشدها كل شاعر و لا يصل لها الا اقل القليل
و اعجبني شموخ الذات في النص و كبرياء العاشق المطعون -
عموما اعذرني في الاسترسال فلو واصلت التعليق على هذا النص فلن تكفيني صفحات .

و لكن اخي هل سيكرر الشاعر نصوصا بصدق و عمق هذا النص بعد فقد الملهمة و رحيلها
انا اتوقع ان الشاعر بلا ملهمة كالفارس بلا حصان