وشّ به عصير التوت يا سامعيني ؟

[راس عيطا]

نخب الجزاله اشربه وسط حانوت
والنص الاخر حسب جوووي يجيني

مو شرط اجيبه في فضاءات بيروت
ولا بشرط اسمع هدير وحنيني

اما لعبنا القاف هند ٍ وبالوت
ولا بلاش الطاوله تحتويني

وجهة نظر لا تحرق اكروت بكروت
ولىّ على قد العقل بتعطيني

شارد من الساحه ولا طالعن اوت
مو كل ساحه للشعر تهتويني

الشعر عندي مسألة عيش او موت
أو ثورة ٍ يقودها موسليني

مرات اطوّلها ومرات بــبيوت
اكتب وما اكتب على ما ( أبيني )

الشعر اشوفه تالي الوقت مفتوت
وحد ٍ يلتـّه لتّ مثل العجيني

لو يستريح اشوي في صمت وسكوت
ويحرص على وقته اذا هو ثميني

ويشوف له شغله ، ولو يعصر التوت
وشّ به عصير التوووت يا سامعيني ؟

بنقاطع الفمتو مع التانق ويفوت
من اوسع ابواب الدعايه بعيني

لا يقرب القيفان ويلعلع الصوت
لن انكر الاصوات ماهو بزيني

يقرى بطون الكتب ويجر لك نوت
ويحطها في ذمتك يالقريني

الشعر كوره والعرب تعشق الشوت
وتشوت بقّاطي مع الشايتيني

ليه ؟ اكثروا فينا والاعلام مسموت
ياكثرهم بالموهبه طايحيني

والمشكل الثاني مشيخات وبشوت
اتقول خشّة ذيب ولىّ احصيني

ماعاد للشيخه عقب راس محروت
معنى يدسمّ شارب الغانميني