مجلس الغيبه .

[محمد البياضي]

قصيده اجتماعيه .


يا مجلس ٍ من دون عمدان واوتاد
________ركايزك ماهي ولا هي كليفه
ما فيك لا دله ولا فيك براد
________و معزبك عمره تعدا النصيفه
يا مجلس الغيبه وللنم مقعاد
________من جاك بيدينه مجود رغيفه
مجلس نميمه مانت مدهل للاجواد
_________اهل الوفاء واهل النفوس العفيفه
اهل الشكاله روس وابطال واسياد
_________بيض النوايا والقلوب النظيفه
ربي رفعهم واعتلو روس الاشهاد
_________اذكارهم فوق الجبال المنيفه
صفيت ضمايرهم على نور يزداد
_________تاريخهم حافل بسيره شريفه
ذولا يشومو عنك يا سم الاكباد
_________يا مجلس ٍ بك كل نفس ٍضعيفه
يا مجلس طياح الهلايم والاوغاد
_________قوم النفاق مسودين الصحيفه
يتجمعو بك من قريبين وابعاد
_________ماهو لجل جاهه ولا لجل ضيفه
ما بين كذاب ومنافق وجحاد
_________هذا خوي هذا وهذا حليفه
ومرتبين الوضع مع كل مرتاد
_________لا غاب ريسهم ما غاب الخليفه
ويورّثون الطبع هذا للاولاد
_________واحفادهم يتوارثون الكسيفه
سود الوجيه يقودهم غل منقاد
_________كبيرهم لا فرق الشمل ريفه
كلاً يعرض بضاعته كيف ما راد
_________ويجيبها على مزاجه وكيفه
يختار له خـّير على الطيب معتاد
_________ويحط فيه من العلوم الصخيفه
واطيبهم اللي يحضر وعلومه جداد
_________والاطيب اللي في قفى الحر سيفه
بهروج تفدح بالقفى قدحة زناد
_________ماهي بشغل ولا نقاش بوظيفه
هروجهم مردودها بغض واحقاد
_________اقلها من الخل تفرق وليفه
لها صدى يدعيك في حرب وجهاد
_________ياصل لقطع الوصل من دون خيفه
ياما وياكم شتتو جموع وافراد
_________ويا كم عيون ٍ من سببهم كفيفه
نيرانهم تحرق وتاكل بالاجساد
_________ماهو بحطب ومولعينه بليفه
نيران ترث ثار ولعقب الاحفاد
_________يظل اثرها جروح ماهي طفيفه
زمره لها بالخبث منهل وميراد
_________منهل خبيث كبودهم ما تعيفه
وبغيرمجلسهم ترى جوهم هاد
_________يتظاهرو بخلاق زينه لطيفه
وان شفتهم بزواج والا بالاعياد
_________اوادم وتحمل دمي ٍ خفيفه
لك يذكرون الطيب والملح والزاد
_________وما بيت واحدهم وصلت لرصيفه
تغتر فيهم كنهم صفـوة عباد
_________ونفوسهم تقبل على كل جيفه
مخافة الله عندهم مالها ماد
_________متوقعين الموت ما يمر طيفه
متجاهلين الحشر للكل ميعاد
_________لهل النفوس الراضيه والمهيفه
واجب علينا نبذهم عاد ما عاد
_________جرح النمايم غير نوقف نزيفه