اعجاب الوابصي في قائدة الطائره وردي .

[محمد البياضي]

من شدة اعجاب الشاعر/ عواد بن عليان الوابصي بقائدة الطائره الاماراتيه التي قامت بضرب مواقع للعدو وتمنى الشاعركأي خليجي وترجم ما تمناه في ابيات واسندها لي .

ابيات عواد /

اعجبتني قايدة طايرة زايد حلاها
----------- ترمي الحوثي بصنعاء وترجع للرياضي
ما درت عني وانا صرت تايه في هواها
----------- كيف اجيها وويش رايك عليه يالبياضي
بالخليج البنت ودي تكلم لي اباها
----------- شد حيلك كود ما فيه مانع واعتراضي

ردي /

ذي خليجيه ومن طيبها زايد وفاها
----------- ولنها من دار زايد هجس قلبك وهاضي
تعجبك يالوابصي وكلنا فيها انتباها
-------------- نفتخر فيها بمستقبل ٍ سجله ماضي
شرفت حاضر به نعيش والمولى عطاها
----------- من صفات ٍ قله بجنسها فوق الاراضي
الحلا والزين من راسها يآطا خطاها
----------- اخت ريم ٍ جفلوه القنوص من الفياضي
اكتفيت بوصفها للعلوم اللي معاها
------------ والفعول اللي بها الكل قنعان ٍ وراضي
كبتن وطيار حربي وعالي مستواها
---------- تمتلك سطوة بطل قلبه من الخوف فاضي
روحها للواجب مجندتها لا دعاها
-------------- قايدة تشكيل وتورد العدو الحياضي
وانت شفت فعولها وهمت والخاطر بغاها
-------------- قمت تتخيل هواها بمأذون ٍ وقاضي
فعلا بقلبك نزل حبها واشعل غلاها
------------ ذا يسمونه ياابوناصر اعجاب الهياضي
يعني وصلك راي صاحبك هالخطبه بلاها
------------- كيف نشغلها وهي للمعادين انقراضي