|
ممنوع الشباب و الحريم ( شياب فقط )
بسم الله الرحمن الرحيم
موضوع للشياب فقط الي ما هو شايب لا اشوف رقعة وجهه و العجايز يتوكلن على الله ما لهن سنع عندنا و الي يخاف من حرمته لا يجينا ( و هو عارف نفسه ) ما ابغى احرجه اخاف انها جالسة جنبه تراقب حركاته لانها بعد 25 سنة زواج صحيت و عرفت ان قلبه اخضر و هواوي يا شين هوى الشيبان !!! الا طاح في الهوى يجيك من أقصاه مدحدر و طاش عمره تقول تريلا مهورة مع الخريطة و سواقها بنغالي المهم العلم لكو خير هذا انا سلمكم الله حويط الثاني عشر شخصيا و من خلال جولاتي المكوكية في كل ديرة جبت لكم علوم سفرة تعجبكم يا هواوية و مثل ما قالوا من طول الغيبات جاب الغنايم و انا لاني شايب عارف حركات الشيبان و امورهم و حركاتهم القرعة و من رد الواحد في المنتدى اعرف ان كانه هواوي و لا جلف الشايب الهواوي من يوم تنزل اي بنت موضوع تلقاه ناقز في حلقها و يصلح نفسه فاهم و حبوب و كيوت و حليل علشان يلفت نظرها . اما الشايب الجلف فماني قايل مواصفاته كلكم تعرفوها مثل اللكدة ( العلة الله يكفي الشر لا يصد و لا يرد ) المهم انا بصراحة خايف على شيبانا من الفتنة في تالي اعمارهم و الشايب مسيكين تلقاه على جال جرف من دون ما تدفه يطيح على خشمه يعني على ريحة المرق يفت عشاه ترى في شيبان ماشي سوقهم مثل واحد اعرفه ( اللهم لا حسد ) المهم علشان هالميضوع قررت اجوز الشيبان الي هنا كلويتهم من اولهم لآخرهم و لقيت لي حريم جاهزات و سنعات و ما يكلفن كثير ودهن بالستر و بالشيبان و مثل ما قالوا المصريات ظل راجل و لاظل حيطة و انا متكفل يالربع بالمهر و التكاليف علشان خاطركم و خاطر مشاعركم المرهفة فأي شايب تنطبق عليه الشروط يرفع اصبعه ؟ الشروط : 1- حاصل على شهادة حسن سيرة و سلوك من عند عجوزه الله يطول بعمرها و عساها تجلس في حلقه حتى تدفنه او يدفنها . 2- يكون معه فحص دوري كامل شامل و تكون استمارته مجددة و ما فيه صدمات و بويته سليمة و ما يكون موضب او حاطط قطع تجارية 3- يكون رجل مقرش و كريم سبلا ( يعني دفيّع ) البخيل ما يحبنه مير مرة 4- يكون يعرف ينظف البيت و يطبخ و يغسل ( هذا اهم شرط ) يعني شايب متفاهم و حليل و يؤمن بحقوق المرأة 5- ما يكون مركب طقم اسنان ( تركيبة يعني ) و يكون يصبغ و مضبط البودي حقه 6- يكون مقطوع من شجرة و لا يبلشها كل يوم بالضيوف حياكو الله و ارحبوا و لا يسوي فيها خليفة حاتم . و اطبخي يا مره و انفخي يا مره . هذا يجلس عند عجيزه و يفارقنا ابرك له . الي له رغبة و تنطبق عليه الشروط يبلغني بواسطة السكرتير حقي و كلكو تعرفوه تروه العمدة المزور ابو عبد الله و السلام ختام العمدة المنتخب حويط الثاني عشر شخصياً من وسط نجد العذية |
رد: ممنوع دخول الشباب و الحريم
هههههههههههههههه
زين عادي اسجل اسم ابوي معاكم الشرووط كلها تنطبق عليه |
رد: ممنوع دخول الشباب و الحريم
هذا انا سلمكم الله حويط الثاني عشر شخصيا و من خلال جولاتي المكوكية في كل ديرة جبت لكم علوم سفرة
و مثل ما قالوا من طول الغيبات جاب الغنايم اقول خلنا نسمع سواليف سفراتك ازين خلي شيابنا لشايباتنا دوررررررررررررر على الشباب ازين تكسب فيهم اجر يالله يا شباب عمكم حويطي الثاني عشر متكفل بكل مراسيم زواجكم ابشررررررررروا بسعدكم وللطلبات ارسلوا لنائب العمدة |
رد: ممنوع الشباب و الحريم ( شياب فقط )
دلع بدوية
ابوكي الله يطول بعمره رابطته امك بعشر حبال وش يفكه منها حنا ودنا بالشيبان الي قلوبهم خضر اهم شي لا تعلمي عمك المهندس عبد الكريم لا يجينا مدرعم هو وقلبه الاخضراني |
رد: ممنوع الشباب و الحريم ( شياب فقط )
اقول يا اعظم حويطية
الشباب ما عليهم خلاف سوقهم ماشي و يسنعوا اعمارهم العرض لشيبان الحويطات فقط و اولهم العم ابوفيصل الاول هذا له من عندي عروس و معها عروس ثانية عرض خليه يتونس و يعيش حياته المشكلة ابو هيثم اشوفه يناظر في الموضوع و ما هو قادر يرد ؟؟؟؟ |
رد: ممنوع الشباب و الحريم ( شياب فقط )
اقتباس:
وبعدين ايش يعني قلب اخظر :D |
رد: ممنوع الشباب و الحريم ( شياب فقط )
انا متكفل يالربع بالمهر و التكاليف علشان خاطركم و خاطر مشاعركم المرهفة
فأي شاب تنطبق عليه الشروط يرفع اصبعه ؟ عزالله كفووووووووووووو انا كل الشروووووووووط تنطبق علي ما عدا هذا الشرط مزود على شوي انا - يكون معه فحص دوري كامل شامل و تكون استمارته مجددة و ما فيه صدمات و بويته سليمة و ما يكون موضب او حاطط قطع تجارية <انا استخدم سوبرشل <<فيه مشكله يعني يؤثر على الشروط والا اروح ابشر الماما >>عجوزنا يعني ههههههه متى طيب اسلم الاوراق بس شوووووووف ابي عروس عروس حاجه كذا تحطها على الجرح تبرا >>ليش مرهم هههههههههه يعطيك العافيه على هيك موضوع ولك تؤبرني <<يلمح لسوريا ههههه بس عجلووووو على المعامله الاسبوع الجاي اقصىمده هههههههههه |
رد: ممنوع الشباب و الحريم ( شياب فقط )
سجلوا عندكم الدحمي
تراه شايب متنكر شوفو سوالفه كلها سوالف شياب |
رد: ممنوع الشباب و الحريم ( شياب فقط )
ماقصرت ياحويطي الثاني عشر
خلي الشياب يعيشو يومهم على تالي العمر وانا من عندي للشياب اللي يبون يغيرون الي يبي له وحده امريكيه ( الشقر )تراهن جاهزات . بس المهم يكون عنده لغه واللي ماعنده يتعلم . تحياتي SHMALY |
رد: ممنوع الشباب و الحريم ( شياب فقط )
اول كلامي بسم الله الرحمن الرحيم
والصلاة والسلام علي اشرف الانبياء والمرسلين سيدالاولين والاخرين بالنسبة للموضوع الي طرحة الاخ حويط الثاني عشروالممتهن مهنة العمدوية وهوحاط بعض الاقتراحات لتزويج الشيبان الي ههههههههههواويه بعضها مقبول والاخرغير مقبول ولوكان حويط الثاني عشر جاد في كلامه كان مرعلي العمدة الرئيسي وهو رايح يم نجد لانه عارف انة من سابق مطالب للعدالة بتهمة انتحال الشخصية ولكن طبعه المروريم الديار بالخفية 0 |
رد: ممنوع الشباب و الحريم ( شياب فقط )
الله يخارج منك ياعمده
ودك تخلي الشياب تندثر من عندنا بالمنتدى والله ليجي للكمبيوتر ولامحمول على اقرب حاويه لوقرت ام العال هالموضوع وخاصه اللي مشغله البحث والتحري ترا العجايز الكبار عندهن غيره ياساتر على حاجه وش اقولك وخلك عن الشياب وانا ابناخك وشوف للشباب والله ان يقبلنا بدون مؤ هلات بس ودنا بنات صح طلقه على قولتهم ماهو من التشليح هههههههههههه تحياتي لك ايها العمده المجد في اسعاد الشياب |
رد: ممنوع الشباب و الحريم ( شياب فقط )
اخوي ابوعمر
الشياب ماتندثر ابد هم الساس والمغراس وعلي اكتافهم قامت كل العلوم السنعه ان كان في المنتديات وفي جميع المجالات وخلي حويط الثاني عشريروح اليلة يم الملعب ويشوف الشيبان كيف يشجعون فريقهم المفضل الاتحاد وهذادليل علي روحهم الرياضيه والهواوهههههههههههههههههههه |
رد: ممنوع الشباب و الحريم ( شياب فقط )
شكرا لك عمو العمده
وانت ما رح تختارلك عروس؟ بعدين انت تقول ممنوع الشباب والحريم بس العنوان يخليك تدخل الموضوع غصب عنك تحياتي لك أعذروني على التطفل |
رد: ممنوع الشباب و الحريم ( شياب فقط )
الله يسامحك صار لك جمهور بسبب هالاعلان
اقول هذا الهديه الي جايبه من سفريتك زواج الشيبان وبكفالتك شهادة حسن السيره والسلوك من عجيزه ماراح تعطيه وبتعطيه شهادة الوفاه ويكون المسكين توكل وماأستانس... دمت اخي الكبير اسئلك شايبي اذ1 عاوز ارسلته لك اختك// سمو المشاعر |
رد: ممنوع الشباب و الحريم ( شياب فقط )
بصراحة عرض مغري:sm105: بس والله ما اتمناه الا ليك:sm136: وبزيد من عندي وحدة مجانا يعني تخيل 3 نسوان :sm21:حته وحد ابسط ياعم بس كاني شايفه قضاك على ايدهن:sm120: وشايف شيابنا مافيهم حيل يردون على طلبك ، كيف عاد يتزوجون:sm291: |
رد: ممنوع الشباب و الحريم ( شياب فقط )
السلام عليكم ورحمة الله وبركاته اقتباس:
أنا أدري إنك تلمز ،، وتهمز ،، وبعد تغمز ،، وما كنت أبي أعطيك ،، وجه وأرد عليك ،، لأنك تستغل وجودنال في الدوام ،،، وتنزل مواضيعك العدوانية << كأنك نمر العدوان ولو جينا نرد عليك ،،، تغيب غيبة طويييييلة ،،، وتميع الموضوع لكن يوم إنك تجيب إسمي صرييييح ،،، تراني ما باسكت لك ،، ومقدم فيك شكوى عند العمدة الجديد ،(البراء الحويطي) ، http://ry85hq.bay.livefilestore.com/...9%8A%D8%B2.jpg لكنه ،، الله يسلمه قال ،،، ولوووووو ،، هاذا جدو حويط 12 ،،، وتراه ،، يا يبه ،، شايل في نفسه منا ،، ومعذور وأشوف إنك تسامحه ،،، وامسحها هالمرة بعمامتي وترا العرض اللي جايبه ،،، جايز لي وأبي أسجل عنده ،،، قلت له ،،، رح إنت وجدك ،،، ولا توروني رقعة وجيهكم ،،، والحمد لله على النعمة اللي أنا فيها !!!! تحياتي أبو ياسر |
رد: ممنوع الشباب و الحريم ( شياب فقط )
الحقيقه يالويس الثاني عشر ان عجايزنا في حقل
يوم الجمعه الماضيه كل وحده قالت لشايبها ودني معك الصلاه قال ليه قالت فيه واحد من جماعتنا ودي ادعيله اكيد عارف الدعوه الله يخرب000000000000 المهم انك رحت في خرايطها عجايزنا دعوتهن والقبر الله يعينك |
رد: ممنوع الشباب و الحريم ( شياب فقط )
اقتباس:
شوف يالعبيواني الظاهر البودي عندك طيب و اخاف تضيّع سوق شيبانا و بعدين حنا نشجع الانتاج الوطني يعني البلدي و اذا ودك بسوريا الله يقويك تراها قريبة و خذ معك العمدة ابو عبد الله تراه خبير هناك و بيسنع امورك |
رد: ممنوع الشباب و الحريم ( شياب فقط )
اقتباس:
هلا بالشمالي انت لابد في امريكا و ساكت و ما ادري كيف وضعك ؟ و بعدين الشيبان عندنا ما لهم بالشقر . البلدي و يالله يتخارجوا .. شكلك ودك تقضي عليهم بدري يا اخوك هذول منتهية صلاحياتهم و ابغى اسوي لهم اعادة شحن و خايف يفشلوني |
رد: ممنوع الشباب و الحريم ( شياب فقط )
اقتباس:
و الله يا عمدة يا ابو عبد الله اني مريت الطايف آخر الليل و انا مثل ما انت عارف عمدة اتيكيت و عارف ان عندك حرمة ثانية من الموديل الجديد و خفت امرك آخر الليل و أجني عليك لان الشايب الا ياخذ وحدة شباب تضيع علومه و يصير مطيع و حليل و ينام بدري يعني هذا جزاي اني خايف على مستقبلك ؟ |
رد: ممنوع الشباب و الحريم ( شياب فقط )
اقتباس:
و الله الحريم الكبار كلهن مشغلات الرادار و بعدين منين اجيب لك طلقة ؟ الطلقة ما هم مخلينها لي و لك طيور شلوى بيلقطوها من بدري اقول يالعميري انت رجل شباب سنع امورك بدري بنفسك و خلنا في حالنا انت موديل جديد ماشي سوقك و ازهم ابو عمر ابو قلب الوان |
رد: ممنوع الشباب و الحريم ( شياب فقط )
اقتباس:
عمووووو في عينك لا عاد احد يقولي عمووووو انا عندي عجوزي و اخاف تذبحني و اصير ضحية |
رد: ممنوع الشباب و الحريم ( شياب فقط )
وش زينه ابو فيصل موب ناقصه شي صحه وعافيه الله يديم عليه يارب ويحفظه
الدور عليك انت بصراحه بعد ماشفت صورتك اللى حاطه البش مهندس حنيت عليك قلت خلاص زواجك على يدي انشاءالله ههههههههههههههههههههههه تحياتي ياثاني عشررر |
رد: ممنوع الشباب و الحريم ( شياب فقط )
اقتباس:
هههههههههههههه جمهوري عريض مثل الاتحاد بلاكي ما تدري بعدين الي بتذبح شايبها الله يكثر خيرها و يكثر من امثالها بتريحنا من التعب و الخساير و شايبك لا ترسليه ان كان ما هو مطابق للمواصفات و المقاييس اهم شي البودي |
رد: ممنوع الشباب و الحريم ( شياب فقط )
اقتباس:
معك حق شيابنا ذبحهم الخوف اما اذا بتزوجيني ثلاثة فاكيد ودك تقضي علي يا بنت الاجواد و هذا بُعدك و عشم ابليس في الجنة قاعد على قلوبكم و مطول بعد |
رد: ممنوع الشباب و الحريم ( شياب فقط )
اقتباس:
حي الله باشمهندسنا ابو قلب اخضر جيت و الله جابك هلحين جايب لي ابناخي البراء يرد ؟ و انا قبل شوي قايم على وحدة تقول لي يا عموووو و جاي انت تقول لي يا جدوووو بسيطة يا عموووو عموما انا غسلت ايدي منك رجال مستسلم و ما عندك طموح للتجديد مثلي خلك نايم و خل الطيور تطير بارزاقها و لعلمك تراك مطلوب بالاسم و الخطيبة جاهزة يلا وريني الهمة اكسر القيد و عطني راسك و ابشر بالعيد هههههههههههههههه شكلي بجيب فيك العيد |
رد: ممنوع الشباب و الحريم ( شياب فقط )
اقتباس:
تصدق يا نديم الشمال اليوم من صحيت صاير امشي على جنب مثل ام جنيب توي ادري ان عجايز العمران داعيات علي قل لهن يا نديم يهجدن لا اطقهن بدعوة اريح منهن عن بكرة ابيهن و قد اعذر من انذر بلغ شيابكم اي واحد متوذي من عجوزه يعلمني ابدعيله عليها و ان ما نفعت الدعوة ارسل لهن واحد من ربعنا عينه عيار بارودة الله يكفينا شره المهم قلهن يهجدن ان كان لهن بعمرهن غرض |
رد: ممنوع الشباب و الحريم ( شياب فقط )
اخوي حويطي 12 انا مستعجل قبل فوات الاوان 0 مستعد بجميع الشروط والفلوس بالبنك
وكل شي اعمله بس ودي العروس مثل ( لميس التركيه ) تكفى وانا اخوك خلني اغسل كبدي ههههههههههه |
رد: ممنوع الشباب و الحريم ( شياب فقط )
اقتباس:
شف انا ما احب اتكلم مع عيال النعمة يذكروني بجدتي الله يرحمها كانت بنت نعمة ماتت الله يرحمها من شوكة دخلت في حلقها و ابو فيصل ابجوزه عند فيك و ورني وش بتسوي ؟ يعني انت ولد نعمة و مدلل و انا شايب بدوي راعي بر يعني ان جيتني رنيتك علقة و خل النعمة تنفعك تراني امزح لا تزعل من عموووو |
رد: ممنوع الشباب و الحريم ( شياب فقط )
اقتباس:
وذا تبي تزوجه الله يقويك هو ترى على جريف بس يبي دزه بسيطه وانت جيته على الطبطاب يله ابلش في عمرك وخلك ذيب وزوجهم هههههههههههههه وبعدين يم ان جدتك ماتعرف تاكل بشوكه ليه تعطونها الشوكه كذا يعني صارت جدتك ضحية الشوكه بس الوكاد انه انت اللى مسوي المقلب فيها الظاهر انت قايلها هذي مكرونه وهى الله يغفرلها تسمع حتسيه لاكن الغطله منك انت وعشان كذا تبي تصلح غلطتك وتزوج شيبانا يعني انبك ظميرك ..هههههههههههههه ظمير ابله حكمة << تحمست معليش ونسبه لي الرنه اللى بالعقال عادي تمون كبر جدي ماقدر اقول لك شي هههههههههههه عسى الله يطول عمرك ... وياجعل الموت مايعرف مافي زعل ولا شي ياجدي الثاني عشررررر ههههههههههههه تقبل تحيات حفيدك ولد النعمه :sm24: |
رد: ممنوع الشباب و الحريم ( شياب فقط )
والله ماهم هاجدين لا العجايز ولاالشيبان
راعي الصيدليه عندنا نزل نص طن(سنافي) ياعمده يعني العالم هايصه وانت ترقص في العتمه ورخيص اربع حبات126ريال بس انت فكنا من شرك والله لو عندك واحد مثل عابر القارات مانفع فيه وابشرك مواليد في الوقت الضايع العجز عندنا متالي الحافظ الله ودهن رصيف يتمشن عليه (عقب التلع والشعبان) والله خايف يقولن ودنا نسبح وتسير (شالفه) والمصيبه يتوحمن عمي هذاك النهار يقول عمتك مشتهيه كيوي وكافيار وتوكس وسنيكرز الله اكبر عقب الحموووووووش اللي قطعن شدوقها والمشكله تناديه غوده عووووووووودتي يقول فريجه فرووووووجتي ايه ياعمده اخر زمن |
رد: ممنوع الشباب و الحريم ( شياب فقط )
اقتباس:
الحمد لله أيامي كلها عيد ،،، وعايش في بيتي سعيد ،، وخللي السفر ينفعك ،،، وش ،،، بيصير فيك أكثر من كذا ،،، http://ry85hq.bay.livefilestore.com/...D8%B7%2012.JPG ولسه ،،، بتضحك على نفسك ،،، وتقوووول قلبك أخضر ومسوي فيها خطابة ،،، قم ،،، بس قم تحياتي أبو ياسر =(أبوأكبر قلب :sm80::sm80::rose::sm80::sm80: أخضر) <<<<< عناااد فيك |
رد: ممنوع الشباب و الحريم ( شياب فقط )
اقووووووو ياحويطي الثاني عشر
خليني ابلغ ابوووووووي وشيبااااااااان جماعتنا عن الاعلا ن هذا تراهم مايصدقوووووووو احد شجعهم. ولوووو كمان تسوووووي اعلان للشباااااااااب تراها ماهي بطاله بعد تحياااااااااااتي |
رد: ممنوع الشباب و الحريم ( شياب فقط )
ههههههههههههههههههههههههههههههههههههه مهندس صورة 2009
الله يعينكم على جدووو حويط يبي يزوجكم غصب غصب .. |
رد: ممنوع الشباب و الحريم ( شياب فقط )
اقتباس:
ما عندنا مثل لميس الرومية عندنا مثل هنية البنغالية و كبدك ما تغسلها لميس اخاف تدبلها خلك و انا اخوك على قردك لا يجيك اقرد منه و خلي فليساتك في البنك ابرك لك و ان بغيت من العجايز ابشر بخلي نديم الشمال يتوسط لك عندهن |
رد: ممنوع الشباب و الحريم ( شياب فقط )
اقتباس:
يبشر و الله ابو فيصل غالي و سعادته تهم العمدة اهم شي يعطيني المواصفات الي يبغاها شيبانا لازم نريحهم و نجيب لهم حريم فل اوبشن الشايب ما هو فاضي يصلح و يسمكر وده شي جديد و عليه ضمان اهم شي لا يهون و يفلشني مع العالم و لا تعلموا وزارة الدفاع عنده لا تحوس الدنيا خلوها ساهية لاهية و شايبنا بنسنع اموره انت اطلع منها يا ولد النعمة |
رد: ممنوع الشباب و الحريم ( شياب فقط )
اقتباس:
نديم الشمال موكد قيمة السنافي و وين يبيعوه ؟ يا خسارة فلوسكو الي ضيعتوها على العجز مثل الي ينفخ له في قربة مقطوعة اقول رد العجر لتلعهن لا تفتنهن بهالعلوم و تبلش في عمرك هلحين لو اوديك السكراب وش بتستفيد منه ؟ اسمع نصيحتي يا ولد خلك في الجديد و اترك العجز في حالهن يحلبن معزاهن و يشوفن امورهن لا تفتح عيونهن على هالسوالف . تراك انت الي بتبلش . و انا علمتك |
رد: ممنوع الشباب و الحريم ( شياب فقط )
اقتباس:
الله يجزاك خير يا باشمهندس من يوم ما نزلت صورتي جاني الخير و خدمتني خدمة العمر الخاص عندي امتلا رسايل اعجاب بجمالي و طلبات زواج و انا جالس انقي و بعدين غريبة انك معترف ان قلبك اخضر اكيد الي بالي بالك مسيرة و ما هي في و انت ماخذ راحتك و هايص لكن صبرك ابقابل عم سعد و اسوي لك فتنة و اقول له اني سمعت يعني ما احط بذمتي و اكيد العلوم بتوصل و ابغى اشوف وش بتسوي ؟ ابغى اقول له اني سمعت انك خاطب وحدة في القسم النسائي بالأمانة عاد يصدقوا لا صار فيها الامانة يا كبير مهندسي الامانة و انا مستعد افكك من شري بس بشرط تصلح لي سليق طايفي محترم و اهم شي ما تعزم العمدة ابو عبد الله اخاف ياكل عشاي و قد اعذر من انذر |
رد: ممنوع الشباب و الحريم ( شياب فقط )
اقتباس:
شوف الشباب قلنا الف مرة سوقهم ماشي و لاهم محتاجين واسطة من العمدة انا بساعد الشيبان فقط بس شوف اذا شيبانكم مهرقلين خلوهم عند عجزهم ابرك لنا و لهم لا يفضحونا عند الاجناب اهم شي الشايب الي يجينا يكون متأنتك و مضبط حاله و لابس جزمة الله يكرمك و متعطر و صابغ شعره و على سنجة عشرة و يدس العكاز و يميل عقاله و اهم شي كمان ما يكون فيه امراض سارية و معدية حنا نبغى نجوزه ما نبغاه يطيح في حلوقنا و يبلشنا بعلاجه و ترى ما عندنا له علاج غير الكي نمحط فيه بالمحاور لما نخليه يعاف هالسوالف الله الله بالشيبان السنعين و الكحيانين خلوهم في منامهم الله يستر علينا و عليهم |
رد: ممنوع الشباب و الحريم ( شياب فقط )
اما عن المعجبات ياحويطي الثاني عشر .......فاانت صااااااااااااااااااااااااادق ...............>>>>كثر منها
ياني لقيتلك وحدة عمرك في حياتك ما تطري سيرة الزواج من بعدهااااااااا http://www.alhowaitat.net/uploader//files/2653.jpg |
| الساعة الآن 09:25 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
إنطلقت الشبكة في 2006/10/17 م - المملكة العربية السعودية - المؤسس / تيسير بن ابراهيم بن محمد ابو طقيقة - الموقع حاصل على شهادة SSL