مات الوداد اللي بالاعمـاق مـزروع
ياليتـنـي ماكـنـت لـلــود زرّاع

سقيت زرع الـود مـن قلـب ينبـوع
لكن زرعـي آخـر تحطّـم وضـاع

مااعاد لي من عقـب جهـدي بمنفـوع
ضيّعت جهدي بيـن شـاري وبيّـاع

حسّبت غرسي فايق الشكـل والنـوع
نـادر ثميـن ولا بالاسـواق ينبـاع

لكن خساره خـاب ظنـي بمسـروع
أنا اشتريت و صاحبي للاسـف بـاع

بلدت بحره من العوالـي الـى القـوع
وعرفت مايخفيـه فـي باطـن القـاع

يخفي اسرار(ن) تدعي الصب مصروع
إن مد في بحـره لقـا الـدول لسّـاع

يلبّسك ثـوب الخطـا دون مشـروع
ويظهر بتالي الامـر ماكـر وخـدّاع

خلا عيوني ع الوجن تـذرف دمـوع
والقلب من زود الاسى صـار ملتـاع

لب الحشا من كثـر لشـواق ممـزوع
بي علة(ن) مستفحلـه بيـن لضـلاع

كنّي بناب ٍ في خفا الجـاش ملسـوع
ابـات ساهـر والمخالـيـق هـيّـاع

ياكم خضعت الصاحبـي ذل ٍ وطـوع
يامر وانا له في الامـر دوم مطـواع

واليوم من عقب الذي صـار ممنـوع
طوعي ولا بصيـر للامـر منصـاع