الشبكة العامة لقبائل الحويطات - المنبر الاعلامي و المرجع الرسمي المعتمد

قالوا جزيل الشعر لا صار مسحوب
والحكمه اللي من شفاه المجانين

والرجل بين الناس لاصار محبوب
والصبر لن الصبر مقضاة الاثنين

وذل ٍ يجي من صوب والهم من صوب
شعور سيْ يقطع الفقر والدين

والحاجه المره اذا قلت يادوب
لاصار في وجهك حيا رايح ٍ وين

يا مل رجل ٍ صابر ٍ صبر ايوب
مثلي صبر عالجرح والغبن والبين

ما نشتكي للخلق والدمع مسكوب
الناس ما تنفعك لو هم غنيين

والزود نقص وكبرة النفس عذروب
كلنا سوى جينا من الماء والطين

والطيب بين الناس سنّه وماجوب
وما يضيع فعله بالرجال الحكيمين

لو ان فعل الطيب للناس مرغوب
ما شفت بالدنيا رجال ٍ رديين

الله خلقنا من سلالات وشعوب
حتى انتعارف والتحابب من الدين

الفضل بين الناس في تقوى القلوب
ماهوب فضل انسابهم والملاين

نخطي ونندم نرجع شوي ونتوب
نلجأ ونرفع للسما كف الادين

النور نور الله ماهوب محجوب
والمعصية تظهر عالوجيه وتشين

ادفع الى الحسنى بحسنى واسلوب
ولاتجادل الابالحجج والبراهين

الصبر فالدعوه الى الدين مطلوب
ولى انت ما تهدي من احببت للدين

واعوذ بك يارب من نفس متوب
ومن قلب ما يخشع الا دمعت العين

يارب نقينا من الذنب كالثوب
في يوم حنا به فقارى مساكين

يارب انا طالبك يا خير مطلوب
انك توفقني الى الفتح المبين

تحيي وتميت وتامر العظم ويذوب
وتكسيه لحم وتجري الدم من حين

لك القلم والغيب باللوح مكتوب
ولك الفضل عند اختلاف الموازين

يا رب عبدك يشتكي كثر الذنوب
يا رب بدلها حساني وتمكين

ثم خصني في رحمتك واقبل التوب
وعطني حنانا من لدن فضلك آمين

يا رب لو تغضب على كل مغضوب
ماكان للتوبه لها ناس راجين

واقف على بابك ونادم ومغلوب
عسى القلوب اللي قست ترجع اتلين