فمان عيونكُ اللي مالها بين العيون .. اُخرى
فمان غــرورك اللي علّـم الطاووس نفـْـش الريش

• • •

فمان عطورك اللي تسكن انفاسي وبالأحـرى
فمان انفاسك اللي تسكـن عطـوري و مدري ليش ؟

• • •

فمان الليل واحضان الدفــا ومصافح القمـرا
فمان البــاب والشبّـاك يــوم اواعـــدك .. ونطيش

• • •


فمان التوت والرمــان واحلى فاكهــه حمـرا
فمان الضحكه اللي كنّـها مـن مبسمك .. بخشيش

• • •


فمان غيابكُ اللي ما ترك لمْواصلك .. بُشرى
فمان الشـك و ظنــون الخطــأ و الكـذب و التشويش

• • •


..فمان الـعـيــــد كنـّي به يجيني وحالتي تزرى
يطبْطبْ فوق أكتـافي حزن ويقــولَ لِي "معْـليشٌ"

• • •


فمان الجوع واحساس العطش ومفارقكُ صحرا
تعبــت افتـّــش بْلوحاتـــها .. واضـنــاني التفتيش

• • •


فمان ضلوع مكتـوب ٍعلى أنحاءها اليُسرى
"هُــنا توجـد جـروحي" لو تكــرّمتي: بـلا تنبيش

• • •


فمان دموع ٌلا تـُسمن ولا تُغني من الذكـرى
وانا اللي ماقدرت اطلع من اجوائي معك بشويش


• • •


فمان الشـارع اللي كلّما جيـته .. وانا أقــرا
معانـاتي من اوّل يــوم فـي وصـلك إلى التهميش

• • •


فمان الشاعر اللي يجمع بتجربْـته الصغرى
فكر بــدْر .. ورومانسيّة نزار .. وفلسفة درويش

• • •


فمان العاشق المجني عليه .. بتسلية عذرا
من اوّل "بعشقـك" حتى نهايـة "ما تصبّرنيش"

• • •


فمان الخوف ويدينك جنود وأضلعي أسرى
وانا فينـي مــن الإحبــاط ما يكفي هزيمــة جيش

• • •


فمان اشيــاء ما تنقــال للعالم .. ولا تــطرى
ممـالك حـب .. دمّـرها اللعب وسْياسـة التطفيش

• • •


فمان الإيش؟ ما أدري ولكنّ الزمان ادرى
وانا اللي ضاع ما يدري حبيبه ضيّـعه لجل ايش؟

• • •


فمان الله ياقلبـيٌ مع انّــك جــرح ما يبــرا
كتب ربّي عليّ اعيشٌ من دونك وانا ما اعيش






مما طاب وجاء على مزاجي