الشبكة العامة لقبائل الحويطات - المنبر الاعلامي و المرجع الرسمي المعتمد

الشعر والاحساس ياخوك ذمه
وعن هذرة الافّاك ربك يعافيك

والمدح في وجه الخلايق مذمه
وكثر المعاصي في حياتك توطيك

العار ثمّ العار سبّ الأئمّه
والجهل مشيك للرجال الافافيك

اهل النفاق الخاسرين المشمّه
على الضلال وظلم العباد تدعيك

الله خلقنا فالبشر خير أمّه
والله خلقهم يعبدوا البس والديك

وكل واحد ٍ حاله على قد همه
لاشفت بلوى الناس هانت بلاويك

لن شفت من بعض العباد المطمّه
شد العزايم لا تداني مقاصيك

الله خلق من روس الجبال قمه
والقمه اللي ما ترقّيك ترميك

والعالم اللي كل ابوهم مخمه
تلقى بدلهم من يودك ويغليك

اللآش لو يحلف على بنت عمه
لا تحسبنه لا ظما الريق يسقيك

والموقف اللي ما يشّرفك طمه
ادفنه في عوج الحنايا وانا اخيك

ولتصدق اللي يمغط الهرج فمه
فالكلمه الحلوه تغرك وتعميك

وان ضاق صدر الشيخ ثوبه وكمه
ابعد عن السكين قبل ٍ تضحييك

واليا اشلهب الوقت غمه بغمه
دوّر على اللي يوصلك ما يخليك

ذيب ٍ الى منّه عوى شاش دمه
من جيب عطران الشوارب يعشيك

مر ٍ يأمك بالصلات وتأمه
يامرك بالمعروف وللذنب ينهيك

يحب راس ابوه وايدين امه
ويدعي بظهر الغيب لا جيب طاريك

ولى الردي لا جيت تلقاه رمه
يفرّك ادينه وهو مبتحل فيك

لو انت مبعد عنه ولا جيت يمه
يغثرب إلعدك ولا هو مصافيك

ريح الخيانه في ثيابه تشمه
وان غبت عزالله يبيعك ويشريك

يفرح الى ما شاف بالسوق لمه
يهز بكتوفه ويشمت وينبيك

على بذور الخير يفحّ سمه
حية تبن وان كشر الناب يوذيك

يقطع لهرجك قبل إنك تتمّه
متلون ٍ ولسان كذبه تماتيك

ان جيتله يرميك في وسط جمه
يزيّن اعمالك وللشر يهديك

حذرا تجي يمه وحذرا تضمه
وحذار يمينه لا تجي في يمانيك

والشعر والاحساس ياخوك ذمه
وعن هذرة الافّاك ربك يعافيك