الشبكة العامة لقبائل الحويطات - المنبر الاعلامي و المرجع الرسمي المعتمد

تعال روّح جاي يا شيخ عقله
ودي انصحك قبل المكر والخديعه

لك مجلس ٍ مفتوح للي يدقله
للسربته والسرسره واللكيعه

الهيس يا عقله يبي من يعقله
قبل المهونه والزعل والقطيعه

وش قيمة الرجال لا غاب عقله
يهز راسه كل شور ٍ يطيعه

سرّهد جناحه ما درى وين نقله
وقامت تناوشّه الطيور وتريعه

وان كانه أوعد رجل قام وحلقله
يرهن شرف نفسه ودينه يبيعه

لا شاف ضيفه عظم ساقه يرقله
يا كن شاف الموت ولى الفجيعه

الشيخ درب المخطيه ما يحقله
الشيخ يشبح للقمم والطليعه

بعض الرجال اليا حضر حط ثقله
على الامور التافهه و الوضيعه

وقام ايتحقرص كل باب ٍ طرقله
وفكّ الزرار وجاب هرجه جميعه

هيس ٍ هميلق كل رجل ٍ علقله
هماز لماز ٍ وذمته وسيعه

اللي يشوفه يحلف انه شفقله
وهو ممحل ٍ كنّه سرابا ً بقيعه

واليا ضحك تحقره تسعين مقله
واليا تنحنح ضاقت ابه الوسيعه

هذا تزهلّ له وهذا نطقله
وهذا يدق صدره وعهده يضيعه

متذبذب ٍ مع كل صبع ٍ يطقله
مثل المراوح بالتلفتّ سريعه

واختامها راحت على اللي يدقله
وياخذ علومه والسوالف شنيعه!