الشبكة العامة لقبائل الحويطات - المنبر الاعلامي و المرجع الرسمي المعتمد

ما على الدنيا حسافه ولا على الدنيا عتب
ذكرياتي بالطفوله ذكر يا تي بالشباب

يوم قدني طفل جاهل والعب بذيك اللعب
اذكر اني حافي الرجلين والعب في التراب

كنت طفل(ن) بالفريق يحب شي اسمه شغب
يوم جمعنا بعضنا في عصابات العقاب

ثم كبرت وصرت احفظ ما قريته بالكتب
كنت اروح المدرسه واحمل على كتفي كتاب

ويوم جارتنا تصارخ يا ولد هدي اللعب
كنت اطالعها واضحك تاخذ امي بالعتاب

يوم جيران الفريق احباب اخوه او نسب
والقرايب مثل ليل العيد جمعتهم تطاب

ذا يسر ذا يهلي يالله حيهم والرحب
والتواصل بينهم يقطع محابيل الغياب

يوم جلستهم قصايد كلها ذوق وطرب
يوم قهوتهم على جمر الغضا احلا شراب

مجلس(ن) فيه القهاوي ما توانى بالطلب
جمعة (ن) فيها رفيعين المكانه والجناب

لا زبن فيها ردي ولا دهلها ولا قرب
ولا نصاها الهيس مره ولا لفاها ودق باب

جمعتهم هالمحبه لا مصالح لا سبب
والسعاده بينهم تطفي فنار الاكتئاب

كانت الجيره تأآخي لا مجامل لا كذب
لو زبن هالجار جاره يحتزم لين الرقاب

يوم قاموا للصلاة وقام عنهم هالتعب
ثم عادوا للعشا من نعمته لذ وطاب

لا محاريب ومساجد لا مأآذن لا قبب
لا ارفعوا كف الضراعه والدعاوي تستجاب

عدهم ماي (ن) زلال وارضهم قاع (ن) خصب
لا افلحوها واحصدوها اثقل الحمل الركاب

غرسها الزيتون والرمان وقطوف العنب
خيرها يشبع بيوت الجوع والنمل السراب

ديرة (ن) فيها الخزامى والنفل واحلا عشب
زهرها العطر الملاكي وشيحها مسك التراب

عيشهم خبز وثريد وحلوهم تمر ورطب
شربهم من ديد خلفه قد رعت بين الشعاب

الدهر ياما اكل من بيتهم ولى شرب
وفي الزوايا عنكبوت(ن) تنسج خيوط الخراب

حوشهم رث (ن) قديم وبيتهم طين وقصب
والسنه عقب السنه لا بدلوا رث الثياب

والعذارى عندهم سبع العجايب والعجب
شامة(ن) عالخد تحني فوق هامات الضباب

والشعر يفهق جبين الليل وتلوح الشهب
والعيون تعانق الازهار في ذيك الرحاب

غير كحل العين ما حطن ولا لبسن ذهب
عطرهن زهر البوادي شعرهن ما به خضاب

لبسهن سود المدارق ما وطن درب الكذب
العفيفات الاصايل ما اكشفن عين النقاب

يكفهن من شر حاسد غاسق(ن) شره وقب
منصتات(ن) صامتات (ن) ناعمات(ن) للجواب

كل عفه وكل طهر الارض فيهن انكتب
ساكنات(ن) في الطهاره وحافظات(ن) للجناب

وعند ذاك التاجر اللي عكَف اطراف الشنب
ينزلون الشام مره ويشتروا بعض الزهاب

عيشة(ن) كلها بساطه والقدر فوق الحطب
دام فيها هالقناعه ما بها اية صعاب

وكان ابوي ان جاه ضيف(ن) شاح بيده للسحب
مرحبا يالله انتحيه ما همل طش السحاب

وكانت امي تدهر الضو تسرجها وتشب
وفوق هاك الصاج خبز رقاق يومنه يجاب

كانت الدنيا جميله وكنت عايش في عجب
طفل جاهل بذته دنياه ما يعرف حساب

يوم تاتي هالحلاوه وطعمها يجلي التعب
رغم ما فيها مشقه ورغم ما فيها عذاب

علموني هالمراجل والمكارم والادب
وحفظوني جزء عم وفاتحة ام الكتاب

علموني كيف اصبر كيف امتص الغضب
وفهموني شلون ارقى للقمم فوف الهضاب

إغرسوا فيني مفاهيم وتقاليد العرب
وقالوا اكبر يالمسمى والزمن غاد(ن) سراب

من يمسح عن جبين ابوك قطرااات التعب؟
من يعز الراس غيرك لا ذبل شعره وشاب

آه منها ذكرياتي وين قفت ياعرب
ما اشوف الا عيون البوم وجناح الغراب

ما على الدنيا حسافه ولا على الدنيا عتب
ذكرياتي فالطفوله ذكر ياتي فالشباب

1998م