الشبكة العامة لقبائل الحويطات - المنبر الاعلامي و المرجع الرسمي المعتمد

قال :

لا شك حب الطير شارك عيالي = ولو ما أتسلى بالولع كيف أبا أعيش
والله ماني عن غلا الطير سالي = لو نطعمه من بارد الخبز والعيش
ولو كان للخارج نشد الرحالي = وندفع على شانه ضريبه وبخشيش

وقال :

ما ضاع عند الطير ماهو بمخسار = لا صار وقت الطير ماهوب هابي
والطير حبه دق بالقلب مسمار = من يوم أنا في عنفوان الشبابي
قلبي يحب الطير والطير بوار = خصٍ ليا لد النظر للعقابي
تركض وراه وتقل ترميه بحجار = لو شاف نسره كن بالخرج دابي
ينسى الجمايل ويتنكر تنكار = نفسه قزازه قابله للخرابي
ياما على دربه تجاوزت الأوعار = وأصيح وأومي له وهو ما شقابي

وقال :

ماني مسود لحيتي لو غدت شيب = ولا ني مغير بأسود الصبغ شيبي
لا عاد لا عاشق ولا ني بخطيب = حقي من الخفرات حاشه نصيبي
البيض مالي من وراهن مطاليب = مالي بهن لو جوّدني بجيبي
وطرد الهوى مابه ملامة ولا عيب = ليا صار بحدود الشرف مايعيبي
وأنا غرامي رفقة الطير والجيب = وشوف الحباري وقع ولا هريبي
ومد النظر في نايفات المراقيب = وقص الأثاري مع جناب الشعيبي
مع الرجال مكملين المواجيب = ما ارافق الا كل رجلٍ نجيبي

وقال :

العشق مالي في مجاله وظيفه = مسلمه للي يبا العشق تسليم
هواي لا عديت راس المنيفه = والطير صايم وأخويايه شغاميم

وقال :

أنا على المقناص قلبي يرفي = فتره ونرجع يم أهلنا مناكيف
بديار لفروق الحباري تلفي = جنوب من حزم الجلاميد وطريف
الطير هو غاية مرامي وشفي = أقدره تقدير الأجواد للضيف
من كبر قدره شايله فوق كفي = وأرعاه تسع شهور بالقيض والصيف

وقال :

قلبي مولع بالصقور القواطيع = من عرفتي للعلم هذي طبوعي
اللي على بيض الدواغر هواليع = لا فرعوهن للهدد عقب جوعي
بأرضٍ بها غير البذيرة طواليع = قفرٍ بها بيض الدواغر ارتوعي
لا شافهن طير السعد عقب تطليع = هذي تكوبر له وهذي تقوعي
بأرضٍ بها روس الزبيدي مصاليع = ما دوجت فيها الغنم والنجوعي
قفرٍ يداعبها نسيم الذعاذيع = فيها غمير العام مثل الزروعي
هذا هوايه يا بعيد المراميع = حب الولع معلق بقلبي ولوعي
مادام انا بالسوق لا أشري ولا أبيع = قنعان بالمقسوم ما ني بشوعي
ودنيا الفناء خليتها للطماميع = لا حصل ستر الحال منها قنوعي

وقال :

ولعت قلبي يا ابراهيم توليع = وذكرتني دوري مع الطير هزاع
وحب الطيور هوايةٍ مالها ريع = إلا الوناسه مع طويلين الأبواع
يوم الولع ينعش قلوبٍ مواليع = والصيد مادونه حوامي ومناع
تلقى الجوازي بالصحاري مخاضيع = والبر فيه اشكال من كل الأنواع
واليوم ماحتى نشوف الجرابيع = يم الديار اللي بها صيد وإسباع
مقناص بس نضيع الوقت تضييع= نقفي ونقبل بين وديان وتلاع
[/poet]