الشبكة العامة لقبائل الحويطات - المنبر الاعلامي و المرجع الرسمي المعتمد - بقلوبنا حي لو كان القدر شاله. قصيده للشاعر/ محمد البياضي.

مرثية في الملك فهد بن عبدالعزيز رحمه الله تعالى باذنه ومبايعه خادم الحرمين الشريفين الملك عبد الله بن عبد العزيزملكاً للبلاد .

( بقلوبنا حي لو كان القدر شاله )

عزيت غيري ونفسي من يعزيها
_____________بك يا زعيم ٍعن أرضه شدّت رحاله
أقفت ظعونه عن الدنيا ومن فيها
_____________الحكم والأهل والإخوان وعياله
والدوله الليّ تدًرج في كراسيها
_____________لما رفع صيتها والطير غنى له
اختلت الأرض واهتزت رواسيها
_____________والشعب هل الدموع وضايق ٍ باله
أقفى عن ايتام تنظر عطف واليها
_____________حاجاتهم تنقضي من صافي أمواله
أقفى عن أرامل ٍشوفته تكفيها
_____________والصم والبكم والليّ ساءت أحواله
أقفى عن عيون ذلّت حال باكيها
_____________من كثر ما تذرف الدمعه قضت حاله
وعن ناس مرضى بعين العطف راعيها
_____________يمناه تعطي وتجهل ما بها شماله
وأقفى عن أطفال تومي له بياديها
_____________من حبهم له وتقديره وبقباله
وإن حل في ديرة ٍمن حظ أهاليها
_____________من شوفته كم ضعيفٍ حقق آماله
خيره كما الغيث يوم الأرض يسقيها
_____________يا كبر فرحة جميع الناس بحلاله
وإن جيت أعدد فعوله ما أقدر أحصيها
_____________فعول ما تنحصر من كثرة أفعاله
اعـمــال فبلادنا كلاً علم فيها
_____________والتوسعه في الحرمين أعظم اعماله
والزفلته والإناره في نواحيها
_____________خطط ونظّم وسم الاسم وشتاله
خادم شرف للبيوت الليّ اعتنى فيها
_____________بيوت ربي وهذا فخر ما قاله
يطبع مصاحف وتترجم ويهديها
_____________من مجمع ٍ خص للمصحف مهياله
وخيام ضد الحريق الليّ مسويها
_____________لكل من حج بيت الله ومن جاله
نظم مدّنا وجمل في شواطيها
_____________طوّر قُرانا ونار الشعب وجباله
والماء مشاريع حتى النبت يرويها
_____________وما يطلع إلا من الأعماق بالآله
والعلم عم وشمل حضر وبواديها
_____________لما انتشر في وطنا والجهل زاله
صروح للعلم شرع الله مباديها
_____________وسنة نبياً لنا شال أطيب رساله
وكم جامعه فالبلاد أرسى مبانيها
_____________طوّر وحدّث وزاد العلم منهاله
ومستشفياتٍ مطوّر كل ما فيها
_____________وأكفأ أطباء وتمريض ٍوعماله
والطايرات الحديثة فوق أراضيها
_____________خطوط ركاب وأيضاً خطوط جواله
ومواصلات البحر والأرض موفيها
_____________ومشروع جسر المحبه مطول أمياله
وأعمال خارج وطنا كيف اخفيها
_____________مادام فعله يجي في سياق ما قاله
ومنها أعاد الكويت لمجد ماضيها
_____________في معركة إبها وسام أهل الشرف ناله
وجهوده مع الدول ما أطيب مساعيها
_____________يـبـذل جهــوداً مـع المحتــاج قــتــاله
حقق لكم دوله ودوله أمانيها
_____________وأعاد بسمة هل الصومال صوماله
يفزع مع أهل الكوارث لين يرضيها
_____________ويعيض منـكــوبـها في عمه وخاله
يمناه طولى بدرب الخير مرخيها
_____________ناصيه ما خاب لا جاه وتعنى له
يبشر بعزوه تحزم دون عانيها
_____________ابن الملوك الفهد لا كبرت القاله
هذي شجاعة فهدنا غير اسميها
_____________فالوقت هذا قليل نشاهد امثاله
بلادنا عن شرور الغير حاميها
_____________حصّن وطنا من العدوان برجاله
والمملكة بلادنا بالروح نفديها
_____________دار الكرامه لناصيها ومدهاله
من طيبها بدمنا الطاهر نغذيها
_____________لا جاء نهار ٍيشيب شدة أهواله
من دونها نرخص الغالي ونغليها
_____________نرشف سموم المنايا رشفة بياله
هذا الفهد قايد النهضة وبانيها
_____________بقلوبنا حي لو كان القدر شاله
ومادام روحه تعلّت عند واليها
_____________عوضه يالله بالفردوس وظلاله
ولا شك حط الرعيه عند راعيها
_____________في يد شجاع وبطل من خيرة ابطاله
عبدالله الليّ ليا شبّت يطفيها
_____________الـنـادر الـليّ عـديم الـشـكـل بجياله
مواقفه لو تغطى كيف أغطيها
_____________يا كود اغط الفضاء بالبشت وخياله
بعيون كل السعودية ومن فيها
_____________يا مقربه بالنظر يا بعد منزاله
ويعيش سلطان بولها وتاليها
_____________شهم وشجاع ٍ بمخراجه ومدخاله
ولي للعهد والسلطة نشأ فيها
_____________يسلم لنا ذخر في حله وترحاله
نفسه على شدة الدنيا مضرّيها
_____________فعـول مشيوفةٍ والنعم بقواله
عروق دمه من الجسره مسقيها
_____________لما ارتوت بالفعول وزاد معداله
هذي مواثيق ما أنقضها ولا أنفيها
_____________واجب نبايع ملكنا والسعد فاله
عبد الله الليّ صفاته نفتدي فيها
_____________وأخوه سلطان في نهجه ومنواله
والأسرة الحاكمه عزوه بطاريها
_____________نعم المراجل ونعم الصيت وسلاله