الشبكة العامة لقبائل الحويطات - المنبر الاعلامي و المرجع الرسمي المعتمد

.. ما اذكر اني كنت خاين وياما بأحساسي وفيت.. ,
آه ياقلبي اللي كم تحملت وشقيت
كم تواجه في حياتك من تصانيف وعذاب

كل ماجيت اشتكي لك جيت لكن ويش لقيت
كل ماصكيت باب ينفتح مليون باب

ايه اكبر ذنب اني بالعطا جدت وعطيت
..وايه اكبر ذنب قلبي ماشكى ذنبه وتاب

وايه اكبر صدمه اني في المقابل ويش خذيت
كل مامديت كفي شفت انا عشرين ناب

ماعرفت النوم ليله وان حصل ليله وغفيت
القى احلامي مدينه بينها وبيني حجاب

والصبح لا من طلع لي بعد ليلي ثم صحيت
عشت انا نفس الحكايه والدمع بالعين ذاب

ان خطيت اسبق خطايا بالعذر لا من خطيت
وان خطا غيري اسامح دون شرهات وعتاب

ما اذكر اني كنت خاين وياما بأحساسي وفيت
وكم نسيت طعون غيري وماحسبت لها حساب

اصدق الكذبات غايه عشتها لا قلت ليت
والامل عندي يشابه بعدها وجه السراب

والجدار اللي تحمل هم ناس وهم بيت
شالت اركانه ملامح من صور ناسه وشاب

لو سكت الصمت يذبح وادري اني لو حكيت
شفت ان كف السؤال يفتقد كف الجواب

ولو رضيت ما اظن تفرق نفسها لو مارضيت
دام ظني في النهايه عكس ماشفته وخاب

الدموع اليوم تجرح جفن عيني لا بكيت
مثل ماتجرح بروق الغيث اطراف السحاب

وماخفى لليوم اعظم بس انا توني دريت
الوفى هالوقت اصبح للاسف شي يعاب

علموني كيف احيا وداخلي احساس ميت
كيف اكون بجد حاضر وانا مطعون بغياب

من سئل عني انا اللي تهت في عمري وضميت
مثل ضامي وسط صحرى يرتجي كف السراب

بس ياقلبي كفايه كم على نارك وطيت
والشعر من نار حبك يحرق اطراف الكتاب

ماقدر اني اكون الا شخص عادي لو بغيت
او غريب اليوم منفي من ديار الاغتراب