الشبكة العامة لقبائل الحويطات - المنبر الاعلامي و المرجع الرسمي المعتمد - وكل يوم فى حبك تزيد الممنوعات ... وكل يوم باحبك أكتر من اللى فات

- منتدى المنقولات الأدبية (https://www.alhowaitat.net/forumdisplay.php?f=19)

وكل يوم فى حبك تزيد الممنوعات ... وكل يوم باحبك أكتر من اللى فات

شاعر العامية الكبير /احمد فؤاد نجم

ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام
.................
وكل يوم فى حبك
تزيد الممنوعات
وكل يوم باحبك
أكتر من اللى فات
.................
حبيبتي يا سفينه
متشوقه وسجينه
مخبر فى كل عقده
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك الربيع
أعود كما الرضيع
بحرقه الفطام
.................
حبيبتي يا مدينه
متزوقه وحزينه
فى كل حاره حسره
وف كل قصر زينه
ممنوع من إني أصبح
بعشقك .. أو أبات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم باحبك
أكتر من اللى فات