من لا اجتهد في مبتدى العمر ما ناش
السمعة للي ترفعه لا احتماها

والمرجله بير(ن) ارشاها من ا لكاش
يارد لها اللي صامل(ن) لا بغاها

اترك رفيق(ن) ما يعيش ويعتاش
ويقسم اللقمه الى من خذاها

ودور عريب الساس وابعد عن اللاش
اللي يصيد برميته لا رماها

هذاك قرم(ن) خوته تبرد الجاش
صنديد صامل لابغاها.... لقاها

قسمه سمين(ن) بالمراجل الى حاش
والمرجله في راس عيطا بناها

عزام جزام(ن)بمسرى ومغباش
وكريم يجزل مدته لاعطاها

وراسه الى سمع العزاوي لها شاش
ويرد لعيون النداوي انداها

لا كلحت لنياب ماهو بينداش
فعله جميل وكلمته في اقداها

لاجاوه الضيفان جاء عنده اخراش
يخاف من تقصيرته في اقراها

وقلبه مع ربعه مثل صافي الشاش
ولا ثقلت احمول الضعيف قواها

من بينه فعله يقولون له عاش
ويعتز في ربعه ويكسب ارضاها

وكلمة ((نعم)) مع ساير الناس ببلاش
لاشك وين اللي بفعله سباها


‫قصيدة المرجلة ، كلمات صالح المري،إلقاء إبراهيم الصيخان‬‎ - YouTube


للشاعر / صالح المري