يا ناس خلوا كل وادي ومجراه
 

[poem=font="Simplified Arabic,5,darkblue,normal,normal" bkcolor="transparent" bkimage="../backgrounds/8.gif" border="double,4,gray" type=1 line=0 align=center use=ex num="0,black"]
ياالله يااللى تسجد الناس لرضاه = يا وامرٍ خلقه على حج بيته
تفرج لمن سدّه على الناس ما ابداه = راضي على مقسومك اللى عطيته
من شي يسلّ الحال والجسم يبراه = والناس ما يشفونه ان ما شفيته
قلت آه واجرحاه من علتي آه = وان حمّلوني حمل غيٍ قويته
قالوا سفا بالحال ويش اللى اغواه = قلت آ ه ويش المنكر اللى وطيته
قالوا جهلت وبان علمـك لمنهاه = قلت آه علمى يا ملا ما كميته
قالوا طلبنا لك من الله معافاه = قلت آه وحّدته وعفوه رجيته
قالوا هله واحباب عينه نـصحناه = قلت آه هذا واردٍ ما بغيته
قالوا ندوّر لك من البِيض حلياه = قلت آه لو غيره بكفى رميته
قالوا نشاش العُود مالك بلاماه = قلت آه عُود الموز بيدي لويته
قالوا تزوّج كود تدله وتنساه = قلت آه لو خذت اربعٍ ما نسيته
قالوا من اقصى الناس وين انت وياه = قلت آه ما انسى يوم جانى وجيته
قالوا نشوفه عند هذا وهذاه = قلت آه عمره ماعقب حج بيته
قالوا عليلٍ ناقلٍ داه برداه = قلت آه باقرابي وروحي فديـته
قالوا نشير ولا نفع ما حكيناه = قلت آه هرّاج النمايم عصيته
قالوا كثر شيبك وقلبك بعمياه = قلت آه لو قلبى غريرٍ نهيته
مطاوعٍ قلبى بعجفاه وقداه = والى عطى منهاج دربٍ عطيته
ياناس خلـّوا كل وادي ومجراه = قلتوا كثير وقولكم ما لقيته[/poem]


للشاعر \عبدالله بن سبيل

رد: يا ناس خلوا كل وادي ومجراه
 

قصيده جميله اخي قرناس
شكرا لك على نقلها
وتحياتي لك

رد: يا ناس خلوا كل وادي ومجراه
 

صح لسانك وعلا شانك
قصيده جميله
سجل إعجابي هنا

رد: يا ناس خلوا كل وادي ومجراه
 

صح لسان الشاعر

وسلم لنا ذوقك قصيده رائعه اخي

تقبل مروري

رد: يا ناس خلوا كل وادي ومجراه
 

شاكر لكم مروركم إخواني الكِرام