الشبكة العامة لقبائل الحويطات - المنبر الاعلامي و المرجع الرسمي المعتمد - يما بحب الجيب غيري مجانين = وياما من العشاق ياما وياما

الجيب
سويت لي في حضرة الجيب بيتين = والورد عجلا والهمام الهماما
اسـوقـها سـوق الرعا للبعاريــــن = واقودها بين النفل والخزاما
جيب موديـل 12 من بعـد الالفيـن = حر الهداد اللي عليه الكلامـــا
من وارد اليابان ماهو من الصين = عليه من شركة تويوتا وسامــا
اشريه لنّه عشقت القلب والعين = وانا بحب الجيب مغرم غرامـــــا
ياما بحب الجيب غيري مجـانين = وياما من العشاق ياما ويامــــــا
الجيب بعض احيان يسوى ملايين = والقيمه اللي فيه ماهي حرامـا
يجيب لي باليوم مشوار يومين = وايضا يريحني بوسط الزحامـــــا
ومادمت متعافي وسالم من الدين = اخير عندي من مناصب (اوباما)
واخير وابرك من حياة السلاطين = اللي يشيلون الحمول الجسامــــا
ابــا اركب الدنا على المركب الزين = قدام ما يركب عليها النشامـا
قـدام ما نـقفي عن الزين والشيــن = ويصير منها قسمنا ثوب خاما
وعرك المنايا بين ستين – سبعين = يا قل من يلحق ثمانيـن عامــا
والــى وصل عمر ابن آدم ثمانين = لا والله الا قل علـيه السلامـــا
يا حالتـه بين الكبر والمعاويـن = هـذا يسلم له وذاك استلامـــــــــا
سهم المنايا (فيه) من وين من وين = ياسرع ما قالو عليه الرحاما
مقفيـن يادنيا المقابيـل مقفيــن = للـه يــا دار الـزوال الـدوامـــــا
الله يجعلنا على الديـن حييـــــن = والخاتمه يا الله حسن الختامــــا

الشاعر عيد بن قيضي الوابصي 18/4/1434هـ