الشبكة العامة لقبائل الحويطات - المنبر الاعلامي و المرجع الرسمي المعتمد

بمناسبة ذكرى وفاتها في مثل هذا اليوم من العام الماضي هذه مرثيتي في زوجتي الغالية ( علياء محمد الجازي) رحمها الله واللتي وافاها الاجل المحتوم في طريقنا ألى مكة محرمين بالعمرة في يوم الجمعة 17/3/2012 وصلي عليها بالحرم الشريف ودفنت بمقبرة الشرايع بمكة المكرمة رحمها الله رحمة واسعة وتغمدها بالعفو والغفران والمسلمين اجمعين .

ألف(ن) اولف من جميل المعاني ... وأنظم من الابيات در(ن) حساني .... اصوغ فيهن ماجرى في زماني .....بوقت مضى لي فيه بعض الجهالات ---
والباء بحمد الله بأبدى قصيدي .... هو مسندي ومشكاي وهوه عضيدي ... انه يوفقني لقول(ن) سديدي... ويثبتن على طريق الهدايات ---

والتاء تركت الفن وايامه السود.... ولاهل الجهل أقسمت والله ما اعود ... من عقب جلسات المراويس والعود ... صرت اتلو القرآن بأعلى المنارات ---

والثاء ثمان وست عمر الهداية .... احلى سنين العمر ماهي دعاية .... قضيتهن مابين مصحف وآية ... وحديث خير الخلق سيد البريات ---

والجيم جنة عدن غاية مرادي .... والقى الشهادة وسط ساح الجهادي ... وانظر بعيني لوجه رب العبادي .... وانال مرضاته وخير العطيات ---

والحاء حياتنا مثل لمحة العين ....تفاوتت مابين زين(ن) معه شين ... بالامس نلعب ونضحك وراعين ...واليوم اشوف بمفرق الراس شيبات ----

والخاء خذينا مع هل الطيب سجّة ...ولابد ماتسلم من شوي دجّة ... الوقت مثل الجو غيم(ن) وعجّة ... واللي يِمِيز الحلو طعم المرارات ---

والدال دنيا الهمّ أبد مالها اصحاب ...من بعد ما تضحك تكشّر بالانياب...ياشين صكاّت بقعا بالاحباب ....تبني صروح الحزن في القلب بالذات ----

والذال ذقت انا المآسي والاوجاع ...والقلب من بعد الهنا صار ملتاع ....والعين حرّى والأمل يا دهش ضاع ... وهم(ن) على الخافق تعلاّه بسكات ----

والراء ربيع القلب اصبح خريفي ...ولا عادني اشعر بمشتى وصيفي ... عفت الحياة انا بليّا وليفي ...ولو عرّضن كل العذارى سراوات ----

والزاء زوله داخل العين مرسوم....وبالقلب قدره من على الكل معلوم .... من يوم شفته ماهوب بالامس واليوم ...اخترتها من بين كل البنيّات ----

والسين سنّه ياجماعة صغيري ...لكنّ تفكيره وقلبه كبيري...محشوم وافي طيّب(ن) ياعشيري...انا اشهد انك قدوة(ن) للعفيفات ---

والشين شاب الرمش من عقب فرقاك...وتجري عيوني دمع لاحل طرياك ...وش حيلتي لاشتقت شوفك ولاماك....مالي جِدى الا بالصور والخيالات ----

والصا صبرت وصابر(ن) واتصبّر...لا شك حكم الرب شي(ن) مقدّر.... لكن يعزّي القلب يوم اتذكّر ... ختم لها ربي بحسن النهايات ----

والضاد ضم القبر سيد الغنادير ...جته المنيّة وهو توّه صغير...أنا اشهد اني شفت في وجهه الخير ...قضى معي بالضبط عشرة سنوات ---

والطاء طبعها الله على زين الاخلاق... وجمال صورتها على الكل قد فاق .... ماسلهمت لعين خاين وبوّاق ....تبعد عن دروب الرّدى والدناسات ----

والظاء ظلمونا ليه بعض القرايب ...كم حاولوا تفريقنا بالنشايب... أنا اشهد ان بعض القرايب عقارب... عسى هل الاسحار دايم بحسرات ---

والعين علّة من ورى ألف علّة ... من بعد فرقى أم الرموش المظلّة ...أنا طواني الهم دقّه وجلّه ...عسى الولي يسبغ عليّه برحمات ----

والغين غابت عن حياتي الافراح ....من بعد ما كنت متهني ومرتاح ....معها يمرّ الوقت في ضحك ومزاح ... حبيبتي في قربها أحلى الاوقات ----

والفاء فديتك كلمة(ن) في لساني ... أقولها للي زهت في عياني ....ياليت مدّ الله بعمره زماني .... وأنا مكانه بالقبر بين الاموات ----

والقاء قدر ربي فعل ما يريده ....وله حكمة(ن) في ما يشاءه سديدة ... هو ربنا المعبود وحنا عبيده ....متصرف(ن) بالكون رب السماوات ----

والكاف كل اللي مضى لا اعتراضي ....على القدر وأكيد صابر وراضي ....ربي غمرني والعطاء منه فاضي ....والحمد لله في النعم والمصيبات -----

واللام لابد اللقاء ياضنيني ....في دار(ن) أخرى خير للمؤمنيني ....واهل المعاصي في صياح وونيني .....يالله تجمعنا الجنان الظليلات ---

والميم موتك يابن آدم قريبي ....لاتحسب أنك عايش(ن) للمشيبي ... ياكم توفى طفل يرضع حليبي ....وكم شب يضحك وأدركته المنيات ----

والنون نلعب ولللأسف غافلينا ...ونطرد ورى لذاتنا جاهلينا ....نهوى المعاصي مثل صيد سمينا.... يالله تغفر لي ذنوب(ن) وزلات -----

والهاء هلي وعزوتي يا آل جـــأزي .... يا كاسبين الطيب يوم المغـــازي ...ربعي شديدين(ن) صلاب(ن) عزازي ....ولا مهونة في رجال الحويطــــــات -----

والواو وفاي ان كنت انا وافي(ن) له ... دين(ن) تدينته وارده محلّه ....واللي بدى ما ينلحق في جزى(ن) له ....قد قالها أهل الحكم والروايات ----

والياء ياربي طالبك ياكريمي ...تسبغ عليها رحمتك يارحيمي ....وتجعل منازلها جنان النعيمي ...فردوسك الأعلى بعالى الدرجات ----

تمت وصلى الله على سيد الابرار ... على النبي المصطفى خير الاخيار ....واستغفر الله من الخطا سر وجهار ... وسلامتك ياللي متابع هالابيات ----

عبدالكريم بن عطاالله الجازي
ابوخالد 17/3/2013