الشبكة العامة لقبائل الحويطات - المنبر الاعلامي و المرجع الرسمي المعتمد

هذه القصيده وجهها الشاعر ابو ريان الدبر إللى الشاعر رفيق المظامي

(..حـب الشـقـا..)

حب الشقا حب على غير مصلوح**

يزيد عشقه مع مرور الليالي

لاصار قلبه من محبتك مجروح**

وانت عن اللي صار داله وسالي

سره غدا بين الملا شبه مفضوح **

وش عاد ينفع دمع يذرف لغالي

يصيح لين أنه غدا الصوت مبحوح**

يبغى القمر واثر القمر عنه عالي

وانت بخيل وصار في عطفك شحوح**

تبخل بحبك على شبيه الغزالي

ترى حبهن ياصاحبي ينعش الروح**

مثل العطش يكفيه مية زلالي

فيه الشقا والجرح والحزن والنوح **

وتشتاق له في كل مرقاب عالي

لو كان حبه باني بقلبك صروح**

تعوي كما السرحان في جو خالي

ورد عليها الشاعر بهذه الابيات :

(..ماهمني دنيا الهوى والجمالي..)

هذا الشقا حبه يشيد بي صروح**

يزيد في جوفي تعدا احتمالي

خلاني اسلى وارتحل بايع الروح**

ولعاد لي عشق سوى راس عالي

امد ناظر حمله وقتي جروح**

واشم بانفاسي عذ يب الشمالي

واهيم بالنفس الشقيه ولا ابوح**

عن شي بالدنيا ثمين غدا لي

وكان الذي مني غدا اليوم مجروح**

ارجوك يافيصل تبلغ ارسالي

قله تراني عن هوى البيض منصوح**

ولابي طريق الحب مهما هيالي

قله شقاوي بالهوى ماله طموح**

معزول عن دنيا الهوى مايبالي

تذكاره الونات وايامه شحوح**

معهنٌ يشد ويرتحل بالجبالي

مبعد يبي له من على الرجم مذروح**

ماهمني دنيا الهولى والجمالي

تكفى يابو ريان وجه له نصوح**

لايضيع وقته يطرد اللال خالي

خله يعزي وقته بضحك ومزوح**

وينسى المحبه مع مرور الليالي

وانا بد رب ودربه اليوم مفتوح**

وعساه يلقى في حياته بدالي

عسى حياته دايم كلها مزوح**

ويعيش متهني من الهم خالي

وينس محبه هزها الوقت بالنوح**

وينسى معاها عيد وان كان غالي