احصانك لسانك وبه لا تستهين
من يستهين بهرجته ما ينولها

اليا هرجت اسرج سروج الصادقين
واليا كذبت اقطع ولا انت ابحولها

خل الكلام الذرب في نصح ٍ ودين
ولىّ الحكاوي خلها ع حمولها

اياك عن كلمه لها وزن ٍ ثمين
ان كان ما انت بقدّها لاتقولها

واياك لا تقضب شليل المسلمين
وتهدم بخت واتحطّها فعدولها

الناس يا غافل لك الله غافلين
والحشّ ماكل راسها لرجولها

واعلم كثير إمن الرجال امقلبين
واعرف ترى صدور الرجال اقفولها

بعض الرجال اتحطهم حط اليمين
والبعض ما ودك بشوفة زولها

ولاتقضّب اللحيه لناس ٍ جايعين
ما يذخرونك لو تحبّ انعولها

والذيب ما هرّفل على نعاج القطين
الا عقب ضاع الرجا بفحولها

والمدح ماهو في وجيه الغانمين
اهل المواقف مدحها بفعولها

والوعد دين وفي رقاب الواعدين
مثل الدروب الواضحه لزمولها

وربك ينورها دروب المؤمنين
ويبعد ظلام الدامسات وهولها

والشيب في راسي وله عدة سنين
يبس الربيع ولا بقى الا امحولها

واخذت من علم الرجال الطيبين
كل ما كتبه الله بنور عقولها