الشبكة العامة لقبائل الحويطات - المنبر الاعلامي و المرجع الرسمي المعتمد

- منتدى المنقولات الأدبية (https://www.alhowaitat.net/forumdisplay.php?f=19)

- - مرثية رائعة للشاعر أحمد الناصر (https://www.alhowaitat.net/showthread.php?t=7063)

مرثية رائعة للشاعر أحمد الناصر

[align=center]هذه قصيدة للشاعر الكبير أحمد الناصر الشايع يرثي فيها ابنه الذي وافاه الأجل المحتوم إثر حادث سير بالقرب من محافظة القويعية التابعة لمنطقة الرياض رحمه الله رحمة واسعة:

نهار ثالث عقب عيد رمضانِ0000000ناس عطاها الله وناس محرومه
أحد قضى عيده سلام وتهاني0000000واحد توصله الكواكب همومه
صادفت صدفه من صدوف الزمانِ0000000منها قوي الحيل تفتر عزومه
هذا زمان الهم والإمتحانِ0000000وقت على قلبي تعاقب سهومه
الاوله كامل جميع المعاني0000000مزبن المضيوم شرع وخصومه
محمد اللي فالقسى واللياني0000000عقبه سمايه غايبات نجومه1
والثانيه باقرب قريب وداني0000000خامس عيالي يوم جتني علومه
قالوا مابين الخاصره وحلبانِ0000000ولدك مات اللي ترجا قدومه
جاء يومه الموعود باربع ثواني0000000قلت السبب قالوا دنا منه يومه
علم على الكبد الصخيفة كواني0000000كية عطب ماتنشكى للحكومة
تهشمت كل الضلوع المحاني0000000مفجوع والمفجوع ما احد يلومه
أخذت لي ساعة وانا في مكاني0000000حسبت لي عشرين طيحه وقومه
اليا بغيت الهرج ييبس لساني0000000والذاكرة عندي تقول معدومه
قمت اتلفت واتسمع باذاني0000000من شاف حالي ماتهنا بنومه
مما بقلبي رحت بالليل عاني0000000للموتر اللي مابقى الا رسومه
عن روحتي ياليت ربي نهاني0000000ولا شفت دمه سايح في هدومه
قمت ودفنته والله المستعانِ0000000في خرقة بيضاء عليه محزومه
يم القويعيه بلاد قحطانِ0000000والحر غير لون وجهي سمومه
واقفيت من عنده وعشري ثمانِ0000000مثل المصبح والبلاد محكومه
والله يالولا اني وسيع البطانِ0000000لاطقها مثل اشقر الريش حومه
طاوعت نفسي مير عقلي قواني0000000عن الخطا مافيه نفس معصومه

1/المقصود به الأمير محمد بن عبدالعزيز رحمه الله

أتمنى أن تحوز على إعجابكم
تقبلوا تحياتي[/align]
[align=center]القحطاني[/align]