الجرح الخفي

رشّيتني عطرك على حسن نية
لكن عطرك ما وقع غير عالجرح

هيّضت حزني يا صديقي عليّه
و أنا أحسب إنه ضاع في كومة الفرح

أنا أدري إنك ما قصدت الأذيّة
و أنا أدري إنك قصدك اللعب و المرح

وش عرّفك بالعلّة الداخلية
و إنته تشوف إن خاطري واسع و برح

الله لو أردّ السنين الخلية
الله لو هو بيدي الجمع و الطرح

ما كنت أفرّط في هذيك البنيّة
اللي تلفظت اسمها قصدك الشرح

اللي كْبَرت فيني شويّة شويّة
حتى بنت للعشق في داخلي صرح

سبحان من خلّى الضعيفة قويّة
تقوى على النسيان و السهو و السرح

لكن إذا رشّيت عطرك عليّه
إحذر وحاذر لا يجي يمة الجرح