مثل المريعي

بعض العرب ترتاح له من كلامه
ولاجيب طريا الفعل قام ايتشره

وبعض العرب جنَب طريق السلامه
باع العوافي واشترى للمضره

مثل الحصيني غادي ٍ عن طعامه
يون من جوعه وذيله يجره

وده على النكبات يبني خيامه
نسا الجميل وشق جيبه وطره

يا كره قلبي للردي والفدامه
لا شاف عج ٍ قام عنه ايتذره

تاجر كلام ولا يعرف الكرامه
ويقول احواله مهي مستقره

مثل المريعي يوم يرسم حلامه
يخط له جره ولا هيب جره

يمشي ولا يدري وش اللي امامه
وده جميع الناس غصب ٍ تمره

هذا دهن سير ودسم عظامه
وهذا لعن خيره وهذا يفره

واكبر مصيبه ينتسب للزعامه
وبقعه تصكه لو على حين غره

اوصيك لا تمشي دروب الرخامه
إخذ الستر لو هو بعيد ٍ وصره

ترى الرجال اشكال حر ونعامه
إحد ٍ يعل القلب واحد ٍ يسره

يا زين من يفرض علينا احترامه
ويا شين من يجهد بلانا بشره

ودنياك هذي للفنا والعدامه
الله خلقها بين حلوه ومره

يعيش فيها اللي ينزل مقامه
لو انه ما يسوى مع الناس ذره

وصارت قصوره مثل قمة تهامه
وكبر الوزاره والسفاره مقره

وشانت على الطيب حياة الغشامه
شاف الجفا منها وشاف المعره

من عقب مشيه ع الشرف والطخامه
جارت عليه وبس لله دره

والحر طرحه بالشبك والحمامه
لو ان جنحانه تروم المجره

ولو ان شحت بالرجال الشهامه
اهم شي العافيه مستمره

الله يسترنا بيوم القيامه
ويجيرنا من هول يوم ٍ وحره

وعسى نلاقي ربنا ببتسامه
بالمشهد اللي كل مؤمن يسره