انا دخيل الاوف من صوت فيروز

اقرى عيوني كلها الغاز ورموز
حاول تفسر مابها دون تعتيم

ان كان وضع الرجل بالوقت مهزوز
شفني انا عالارض والراس بالغيم

انا دخيل الاوف من صوت فيروز
احس فيني تقهر الحزن والضيم

ما جيت ابروي قصة الهم والعوز
بعنا المواتر والدبش والمجاهيم

انا بدوي قلبي عزوم ٍ على الفوز
ما ينحني خشمي بوقت الملازيم

ان جارت الدنيا وانا لابتي عنوز
والله ما احني بوجه المقاديم

ايه عنزي لو يصفق الطوز بالطوز
تاريخنا شاهد على الوقت ومقيم

يانبض قلبي كنه امبير وفيوز
والفكر ماكينه والاحساس تلغيم

ياهيه يابنيه يانبنوبة الموز
يلي حياتك كلها روج وكريم

صدي ابي خشم ٍ على الوجه مركوز
خشم ابدويه تنتخي للمعازيم

دمها خفيف ولا يبيله كلاكوز
ومن الترف تعجز ولا تقطع السيم

قمة دلع فستانها الورد والروز
والصوت له نبرة وبحه وتنعيم

ودي شماليه على الخاطر تحوز
لا هيجنت جرت علي التقاسيم

لبيه يالبيه ياريحة الجوز
والشيح واعواد الغضا والقياصيم

انا اشهد انها درة ٍ بين الكنوز
اجمل من الازهار واطهر من الديم

مولودة ٍ بالجوف في شهر تموز
متخالطه بين الظبا واشقح الريم

قولوا لها قلبي من العام محجوز
قلبي تذاكر والمشاعر مراسيم

لا شرعت سيف ٍ بالاضلاع مغروز
ما زاد قلب يحبها غير تسليم

قلب الشمالي لا عشق مات ملكوز
ما يخاف النيه ولو ربع مليم

ان حب مات ولا حيا عاش مهزوز
طبع الشمالي في جميع الاقاليم

يعطيك الف العافيه
على الطرح الشيق
تقبل مروري
تحيااااااااااااااااااتي