زيزوم ربعه

دنيا تعلم رياجيل المواقف علوم
واللي غنمها يورثها لصفوة بنيه

إخذ التجارب ولا تسأل عفون الخشوم
التجربه هي حصاد العمر يا مشتهيه

بعض العرب احترامه واجب ٍ يالقروم
وبعض العرب وش تبيبه ؟ لا يجيك وتجيه

أبشر وحاضر ولا تلقاه عند اللزوم
مثل النعامه يدس الراس مالت عليه

من ميزاته ردي نفس ٍ ونادر يشوم
ما يعتزي وان تعزوى يفتشل من إديه

وبعض العرب ينطح الكايد ومن راس قوم
وبعض العرب ما يساوي بالمحطه اجنيه

ترى الردي ما يسد الا بوجه الرخوم
وجهه ورى وان تلفت باع بكرة ابيه

ولى الرجل حرّ مدهاله بروس الحزوم
ياطى بوقت الشدايد لا شبح مقلتيه

اهديب شام ٍ يشيل الحمل ثما ً يقوم
عراف قوم ٍ حكيم النفس فرس ٍ نبيه

وان كنت في موقف ٍ صعب ٍ فشن الهجوم
لا تنتظر رحمة اللي ما رحم والديه

المشكله لا تظن ان العدد بالخصوم
المشكله بالصديق اللي تبي تشتريه

ياليت اقدر امد اليد لين النجوم
واقطف صديق ٍ من النجم اليماني وابيه

موسوعة ٍ فالمراجل جامع ٍ للسلوم
راعي مشوره ولا شور الجهل يقفيه

اليا نظر للجبل يدحم بوجه السموم
واليا رقا للجبل يطمح الى ما يليه

زيزوم ربعه سنام ٍ هيلعي وامحشوم
ما يطرد القاصيه والتايهه والسفيه

واليا عرض لي صديق ٍ ما يشد العزوم
أجنبه واطلب الواحد عساه ايهديه