بنقول له سقها

قالوا غريق الموج بالقش يتعلق
وحنا غرقنا والسوالف نصدقها

في مجتمعنا وش بلا الناس تتملق
على رقاب الخلق ولى عواتقها

كم نوعد المسكين ونقول لا تقلق
ولا من عطانا ظهر بنقول له سقها

لو الصحون الطائره فوق و اتحّلق
الا نقول احنا الى الشمس نسبقها

والمصلحه ناس ٍ على الظهر تتسلق
ولا زالت الصفقات للي يحققها

والواسطه لا باب يصعب ويتغّلق
صحيح آفه لكن الناس تعشقها

واحلامنا مثل الصواريخ بس تطلق
ولو ترجع ايام العرب ما نوثقها

ومزاجنا تكدير واعصابنا شلّق
ولجل الهياط انطر الجيوب وانشقها

على قشور الموز نركض ونتزلق
بس شاطرين ابكلمة أهاااه ننطقها

والمحكمه ما بين مضروب وامطلق
وقوانيننا يله عسانا انطبقها

حتى الدواير بين لص ٍ ومتسلق
ما نحفظ الدوله وخدمة مرافقها

ودك تعيش الوقت اسكت ولا اتعلق
لن الزمان اختّل والناس من حقها !!