توفى وعادني طفل واسمه ما نطقته زين.....!!!

الا يالله ترحم من دموعه تغرق الخدين
وتجبر حال من همه يوقد جمر في جوفه
فقدت اغلى البشر عندي ولا ادري شالسبب للحين
توفى ما فطنت اعرف لذاك الموت وظروفه
رحل من دون ما اشعر وعمري حول عشر سنين
رحل من دون نظره ولا رجعه ولا شوفه
توفى وعادني طفلٍ واسمه ما نطقته زين
ولا حتى تخيلته ولا استلهمت بطيوفه
ولا اتخيلت انا صوته ولا همسه على الاذنين
ولا افطن على شكله ولا لونه ولا وصوفه
ولا اذكر ولا ذكرى سوى لحظه مضت من حين
قبل عشرة أعوام عبرها الدهر وصروفه
اشوف اهلي ومن حولي بكى وصراخ مجتمعين
وانا طفلِ بكى معهم من الفزعه ومن خوفه
ولا يدري وش القصه ولا له في الامر يدين
سوى دمعة براءه حيلها يدين مكتوفه
ومضت فيه الحياه سنين تتبع في خطاها سنين
ولا يملك سوى صبر ودعا ودمعات مذروفه
مضت عشرة أعوام ولا لي غير امنيتين
الاولى ان هالاعوام من هالعمر محذوفه
ويرجع بي الزمن لحظه ولو ساعه ولو ثنتين
ابي اجبر عنا قلبي وتسر العين في شوفه
وابي اضمه واسمع منه لو كلمه ولو حرفين
وابي احس الدفا بصوته وفي همسه وبحروفه
وابي اقله يبه محتاجلك يانور هالعينين
واقبل راسه ورجله وامس ايديه وكفوفه
وآخر امنياتي ادعي الله يرحمه ويعين
قليب اللي شكى لله كما تشكيله ضعوفه
عسى الله فيه يجمعني ويرفعنا بعليين
ويصبر قلب من عينه لشوف ابوه ملهوفه