آآآآآآآآآهــــــــــات حزيــــــن 0000

أأأأأأأأأهات حزيــــن

ياما من انواع المعاناه عانيـت
= من هاجسا في خلوتي يهتويني

الهاجس اللــي مايخليني ابيت
= ينصب لنومي عند راسي كميني

ماله دواء ياعيـن وإلا تداويت
= غيـر ان رحمة ربنا تعتنيـــني

ياعيني اللي بيتتك التناهيت
= ان كان ماطاب المنام اعذرينــــي

معذور لو اني على اخوي ونيت
= اللي يشاركني بعسري وليني

ادله ولكنـي الى اخليت بكيـت
= عبرات حزات الوداع اتغزيني

ودّعني الغالي وقفا وانا اقفيـت
= من بعد ماصافح يمينه يمينــي

ماكنت في يوم من الايام ظنيت
= اتفـرق الاقدار بينـه وبينــــــي

الله 0 انا اللي في حساباتي اخطيت
= على الوعد بحسابي إنه يجيني

امــا يجينـي وإلا انا لــه تعنيـــــت
= واما إحتريته والا هو يحتريني

تهلكني الحسرات لنّــي تطـّريت
= ويسبق مراسيل العذل دمع عيني

ابكي على زين النبا عالي الصيت
= سمح المحيا والخطاب الحسيني

ياكثرمن حسن الثنا فيـه عديـت
= وياكثـر مايذكر مــع الطيبيـــني

وياكثر ماشفتـه بقلبــي وهليـت
= وياكثر لك ياخوي لجــة حنينــــي

ماتنسي ياخوي لونـي تناسيــت
= تبقى معي ذكراك في كل حينـــي

ياخوي ما مثلك من الناس حبيت
= مــوالفك ولف الحسن للحسينـــي

ياعزوتي لنّــي بربعـي تعزويت
= اللي بساعات الخطر يفتديني

ويـا منوة الخاطر لمنـي تمنيـت
= شوفك وشوف اللي معك سالمينـي

ويارحمة الرحمن للحي والميـت
= عساك في يوم العسر تدركيني

ياربي انت اعطيت واخذت واعطيت
= انت الولي انت ارحم الراحميني

ارحم حبيبا عن نظر عينيى اتقيت
= غيّـبت شوفه في بواقي سنينـي

ياربي اللي مالغيرك ترجــيت
= عســـاه للجنــه مـع السابقينـــــــي

لولاي لمني تضايقت صلـــيت
= وطلبت من ربي لنفسي يعينــــــي

ولقيت بكتابه عزاى وتعزيــت
= وبشرتها ببشارة الصابرينـــــــي

وصلاة ربي عدمن حج للبيبت
= على محمد سيد المرسلينـــــــــي

في11/4/1432هـ