حب , متعه , لكاعه

هذا واحد يقووول سالفته



بإذن الله , وبإذن الواحد الأحد
إني هالصيفيه بغادر الجامعه للأبد
( ولا أستغني عن دعائكم , تراي مسلم )




مدري ليش محد مستوعب
إني بصير معلم صعوبات تعلم

( الطموح كان عسكريه , بس تأكدت إني ممنوع منها حتى عام 1431 هـ )

يعني اشيل النجمه من راسي للأبد









قبلت مهنة المعلم , وإن مقامي من مقام الرسل
لأني شخص أحمل رساله






محد كان مستوعب ومصدق
إني أكون طالب جامعي

رغم إني تعودت على النجاح بدرجة ممتاز






(( هذي نسبتي في ثالث ثانوي ))
7
7
7

96,20


بذكر لكم مواقف لي
يوم كنت طالب في المدارس
( والله حقيقه ولو غلفتها بالخيال لتمشي عالكل
لكن مشكلتي أحب الماضي كثير وأعتز فيه )





أيام ثالث متوسط
كنا في مدرسه مستأجره
ونقلونا لمبنى حكومي

بعد فتره من الدراسه

جانا ضابط من الدفاع المدني
ومعه كم جندي

عشان يشرحون لنا طريقة الإخلاء
وقت نشوب الحريق


شرحو لنا الطريقه وكيف نطلع بإنتظام من الفصول
بقيادة المعلمين

جاء وقت التنفيذ

رحنا للفصول
ودق جرس الإنذار

وطلعو كل الطلاب

إلا

أنا وطالب اسمه ناصر محمد
( الله يذكره بالخير كنا مع بعض دايم )

انتظرنا لين طلعو كل الطلاب من الدور
الثالث ونزلو تحت

طلعنا من الفصل

وفتحت الصندوق اللي فيه الخرطوم
حق المويه

وسحبته لين وصلت للجدار
اللي يطل عالساحه

وقلت: فك المويه يبو محمد

وفتح المويه
وكنت ماسك الخرطوم
وارش المويه على الساحه
( غرقت الطلاب والمدرسين والضابط )

وناصر يزيد فتح المويه
والخرطوم مره يحذفني يمين ومره يسار
لين طار من يدي وجلس يرش في الدور الثالث


المهم

إنهم مسكونا ودخلونا مكتب المدير

قال : وش تبي انت وياه بخرطوم المويه
ليش مانفذتو اللي قالوه لكم


قلت : يبن الحلال حنا عتابه
لاشبت النار نطفيها ما ننحاش
( من يومي وأنا مهايطي )


لا تسئلون وش صار فينا

تعهد , إستدعاء ولي أمر , توقيف اسبوع عند مكتب المدير ,
جلد بعد الطابور قدام كل الطلاب









(( الموقف الثاني ))

كنت موقف عند مكتب الوكيل
( اليوم الدراسي كله يروح وانا موقف برا
بالكثير ادرس 3 حصص باليوم )


وكان فيه طالب سوداني اسمه معتز
جالس عند مكتب المرشد
ورحت له

واللي فهمته منه إن بطنه يعوره
ويبي يستأذن عشان يطلع
والمرشد قال له : أنتظر برا شوي

أنا جلست أسولف مع السوداني

كان جالس على الكراسي
وأنا واقف وحاط رجلي على الكرسي
ومثبت يدي من فوقه على الجدار
>> واقف وقفت عربجي

وأنا أتكلم معه
جت يدي على طفاية الحريق

قلت: تتحداني ارش عليك البودره

قال : لا أنا مريض

( أنا أستهبل وعلى بالي إن الطفايه
صمام الأمان فيها )

يوم ضغطت عليها
وهي ترش على الزول

أنا إنكتمت وجلست أكحكح
والزول طاح عالكراسي وإنصرع

والمرشد والمدير
يهفون بشماغهم عالزول
وأنا مطنشيني محد معبرني

وشالوه للمستوصف

ودقو عالشرطه ورحت للقسم
( كبرو السالفه وهي صغيره )

وجاء أبوي وبحب خشوم مع أبو الزول
سامحوني وتنازلو عني
ورحت لبيتنا


في اليوم الثاني

حضرت بالطابور وطلعوني على طول
لمكتب المدير

وماكان مصدق اني طلعت
يبيني انسجن ويفتك مني
( والله العظيم هالمدير ماينسى اسمي لين يموت )


اللي قهرني

إنهم ماصدقوني يوم
قلت: إني طفاية الحريق خربانه وصمامها مسحوب
ولا توقعت انها بترش علي أنا والزول

والزول النذل
قال: إني هددته قبل ارش عليه

وصارت التهمه لابستني
وجاب ابوي للمدرسه طفايه جديده
بدل اللي يقولون : إني أتلفتها








(( الموقف الثالث ))

تذكرون شركة المراعي
أول مانزلو عصيرات المراعي

كانو يسوون محاضرات بالمدارس


ذاك اليوم كانو عندنا
بالمدرسه

وحاطينا بالساحه وجالسين على الفرشات
وحقين المراعي يلقون علينا محاضره


كنت في أخر صف
مطنش المحاضره وجالس اسولف واستهبل

ومسكني واحد من المدرسين
وحطني بالصف الأول
قدام الطاوله والكرسي اللي جالسين
عليها حقين المراعي والمدير
( وتندمو ذاك اليوم إنهم جابوني من الصف الأخير )



المهم

خلصو حقين المراعي من المحاضره
وفتحو باب الأسئله

ولا أحد من الطلاب تكرم وسئلهم سؤال

رفعت يدي

قالو : تعال وتكلم بالميكرفون
عشان الجميع يسمع سؤالك

المدير وقسم بالله إني مانسيت شكله
عيونه طايره كنه داري إني بجيب فضيحه جديده له


أخذت الميكرفون
ماكان في راسي أي سؤال ,
ولا لي أي نيه أستهبل

( بس جني اللكاعه جاني , وخربتها )

قلت فيما معناه
( مااذكر كلامي بالظبط )

قلت: الحين أنتم شركه كل اللي عندكم بقر
شلون هالبقر تحلبونها , وتجيب عصير برتقال وفراوله ,
بقر جديده ذي ماعمري سمعت فيها



أقسم بالله
بعدها ماسمعت غير الضحك
في كل مكان بالساحه



طبعاً كانت هي القشه اللي قصمت ظهر البعير
وكانت أخر أيامي في متوسطة الغزالي

لأني طردت من المدرسه مع أوسع أبوابها
وكملت ثالث متوسط في حي النسيم








مرحلة الثانوي

أجبرتني الظروف أكون بالقصيم
صح إني سربوت ودايم بايعها
بس فيني حس المسئوليه

ماكان عندي ولي أمر بالقصيم

وإنجبرت ما أسبب مشاكل
عشان مايجي أبوي أو أخوي
ويمشون 360 كيلو من الرياض للقصيم
عشان يوقعون تعهد

كنت مؤدب وشخص ثاني
( مع مشاكل ومضاربات خفيفه )



المواقف كثيره لي بالمدارس
وبالذات داخل الفصول

أختصرها / يومي كله واقف عند مكتب المدير ,
كل اسبوع أوقع تعهد , لازم بالأسبوع أنجلد قدام كل الطلاب
( صار عندي مناعه من الضرب ومتعود عليها )

ومستحيل أقابل أي طالب
يذكرني أيام المتوسط
ويدري إني دخلت الجامعه
بدون مايستغرب ويذكرني بالماضي







مع ذلك مازلت أقول /

لو كانت جميع الدرجات
على الإختبارات فقط , بدون مشاركه وواجبات


ماراح أكتفي بنجاح بدرجة ممتاز

راح أجيب 100 من 100

بس دايم المشاركه والمواظبه والسلوك
تحرمني منها




(( المرحله الجامعيه ))



حياتي بالجامعه تختلف 180 درجه
عن المدارس

شخصيتي بالجامعه تختلف عن البيت
والشارع

سبحان الله ماهضمت الجامعه
من أول يوم دخلتها








أدخل القاعه بمذكره , وعلبة مويه

دايم مكاني بأخر صف يمين
رجل على رجل , متكتف
راسي عالجدار , مشخص ملكي .
ومرجع العقال ورى

( كني شخص في عزاء موب جامعه )











في الجامعه إعتبارات كثيره /

الإختبار مايكفي للنجاح
ولا يوصلك لأفضل المعدلات

عروض البويربوينت , مشاركه , حضور ,
معرفة الدكتور
كلها أهم من الإختبار



عشان كذا شي طبيعي
إني معدلي مايكون 5 من 5

وشي طبيعي إن دفعتي
صارو مدرسين وأنا مازلت طالب جامعي

( خلوها إختبارات بس وأتخرج بإمتياز )





بقول لكم سر لأحد يدري عنه /

مسموح لكل طالب غياب بنسبة 25%

أنا أول شهر مستحيل أدرس
الغياب أخلص عليه ثم أحضر
( من جد إنسان ماهضمت الجامعه )





بطرح لكم معدلي
ولا راح أخاف من حسد ولا عين
>> بالله بيحسدونك على وش




ماراح أخجل من معدلي
وحذف الأترام , وحمل المواد
( حملت 5 مواد وحذفت ترمين )



لأنها /

لو كانت إختبارات بس
والله محد يسبقني




2,73

يالله لك الحمد الأهم
إنها شهاده









سؤال للفائده /



وش بتفيدني فيه مقررات النجم ؟

معقوله بتكلم انقليزي
مع طلاب ثالث وثاني ابتدائي




وش بتفيدني فيه الأجهزه التعويضيه؟











مقررات ورب البيت مالها اي فايده
لي كمعلم صعوبات تعلم مستقبلاً








ليش ماتكون مقررات إختياريه
بدل ما إنجبر كل يوم امشي عالسياره
100 كيلو رايح جاي في زحمة الرياض ؟






ليش ماتبدل ساعات مواد التخصص
وتحذف هالمواد اللي مالها فايده ؟




فايده عامه بس لأقل ولا أكثر



اليوم اللي يعلن فيه
قرار تعييني كمعلم

ياتعس حظ مدير المدرسه اللي بجيه



راح أموت وأنا أشوف
إستغراب الكل من حولي بأني مدرس



مشكلتي فضيخ قلب

وكل اللي همني رايي في نفسي
ومعرفتي لذاتي
>> يقولون مغرور بس ماني مصدق









وياحظ كل طالب بيكون بمدرسه أنا فيها

( أحس إني بجيب مصيبه ولا راح أتخرج من الجامعه
إحساسي يقول كذا مدري ليش )








تعرفون البرز يوم يقررونه أهله يشترون له بلايستيشن
يكون متحمس ومبسوط


أنا مثله بس أنتظر
اليوم اللي أدخله فيه عى مدير المدرسه

وأقول / المعلم طراد الروقي
قدم إليكم من ربوع نجد بمعدل 2,73
وحب الفلسفه والذبات
أنت ووجهك اللي كنه ركبة شحاد




عندي فلسفه تقول /

المتعه , والحب , واللكاعه

تصنع النجاح




كطالب جامعي انا مثال سيئ

لأني ماهضمت الطريقه الجامعيه كلها


لكن /

سنه بالميدان فائدتها تساوي
20 سنه بدراسة مقررات الجامعه

الإحتكاك يجلب الخبره
والخبره تغني عن النجم والسلم ... إلخ





















(1)

التعليم حب


طالب أمه ميته
طالب أمه مطلقه وعايش مع زوجة أبوه

كيف هالطالبين يطلب منهم قراءة قطعه نصيه
تتكلم عن حنان الأم ؟




منهج وقصص خاصه لكل طالب


طالب يحب الهلال / تكتب له قصص عن نادي الهلال
طالب يحب البر / تكتب له قصص عن البر والأبل
طالب يحب السيارات / تكتب له قصص عن الكامري واللكزس
طالب أمه ميته / تكتب قصص عن قدر الأخ والأخت


إذا الطالب حب شي
راح يبذل كل جهده عشان يوصل له

شي طبيعي إنه بيمر بسلاسه في درس القراءه
عشان يجيد قراءة قصه لشي يحبه
وعشان يفتخر عند زملائه




بعطيكم مثال عن نادي الهلال

ياسر القحطاني مهاجم نادي الهلال , يحمل الرقم 20 ,
وهو من مواليد مدينة الخبر

طالب ثاني ابتدائي وش بيستفيد من هالثلاث جمل ؟

1 ـ عشقه للهلال وياسر راح يدفعه
لحب التعلم لأن فيه فائده بيوصل لها من هالنص اللي بيقراءه

2ـ راح يجيد ويعرف قراءة وكتابة الرقم 20
لأنه رقم لاعبه المفضل ولاراح ينسى الرقم ابد

3 ـ مفردة كلمة الخبر = مدينه من مدن المملكه
( وهنا الطالب حفظ إسم مدينه , لأن ياسر ولد فيها )


التعليم شي بسيط وسهل
بس من يفهم وزارة التربيه والتعليم
بشي اسمه / الحب













(2)

التعليم متعه


عزيزي المعلم
منت مجبور تجلس بغرفة المدرسين
وتفطر معهم

لأنهم / بيتكلمون في الرواتب , والطالب فلان سيئ
وحش في الوزاره , وأمور تجيب الهم



لا تصير إمعه معهم


أفطر في مكتبك والا بغرفة المصادر
والطالب اللي عندك بالحصه الأولى
يفطر معك فول وتميس



أنت تستفيد حاجتين ؟

إنك تمخمخ بعد الفول ,
تكسر حاجز الرهبه بينك وبين الطالب
( كل طالب يشوف المعلم شي لازم نخاف منه )



عندك وقت فراغ

البس رياضه ورح للمعلب
وسحب في المبزره اللي بحصة الرياضه

ضحك عليهم وإنبسط وإستمتع


لأنك وقتها وأنت تمشي بالمدرسه
راح تسمع الطلاب يقولون جملة / إستاذ فلان


ودامهم تجرؤ هالصغار ونادوك
فأنت جلبتهم لصفك وصار تعليمهم شي سهل



إنس الراتب , إنس النقل , وإنس العزوبيه
والشقه اللي تبي تنظيف

تمتع بالمدرسه ياعزيزي
وإستمتع في كسب هالطلاب











(3)

التعليم لكاعه



المدير طنشه
وخله يعرف إنك شخص منت معبره ولا مهتم فيه

عشان مايغثك ولا يعبرك

حسسه إنك مريض نفسي
وأخر همك كيف تنقل من هالمدرسه

خله يوم يشوفك يتجنبك
ويندس عشان ماتذب عليه قدام المدرسين



مهمتك كمعلم كيف تدرس الطلاب
موب تفرض إحترامك عالمدير






طالب بدوي ؟

لا تقوله 5 + 1 = كم



قل له /

عندك 5 نياق وابوك عطاك ناقه
كم يبي يصير عدد نياقك ؟

صدقوني بيعد لين يقول 6
( مايدري انه يتعلم الحساب )



( إستهبل وأضحك وتلكع , بس اعتبرها
بوابة وطريقة للوصول لهدف )



فلسفه جديده بالحياه

التعليم = حب , متعه , لكاعه





ملاحظة / الموضوع لا يمثل رأيي الخاص بهالشي -----> حــزن النبلآإء

[align=center] اقول والله سالفتك طوووووووويله ونا توني صااحي

وبعدين اخاف ينشف حلقي ونا اقراء



لي عوده بعد الفطووووور ياحلووو[/align]

هذا قصة ولا رواية اجاثا كرستي
ياخوي عطشت وانا اقرا لي عودة بعد الفطور

مشكوورين ع المرور يا عطشانيين

طيب قول اني ماخذ السالفه من واحد شي ههههه

ههههههههههههههههههههههههه

فريت لي عقلي ماعاد افهم >>تنحت



دمت بود

المشاركة الأصلية كتبت بواسطة ذيب الرياض

طيب قول اني ماخذ السالفه من واحد شي ههههه

منهو هذا واحد شي ؟؟ ^^

المشاركة الأصلية كتبت بواسطة قمر الغناميين

ههههههههههههههههههههههههه

فريت لي عقلي ماعاد افهم >>تنحت



دمت بود

مشكورهـ علىآ مروركـ

يعطيك العافيه حزووووووووووون


تقبل مروري

أول ماقريتها ع بالي انت ,,,,
بس امتعتني ,,,

وزين اني ماقريتها بانهار لاني انا بعد عطشت,,,,

بس ارتويت من استمتاعي بقرائتها ,,,,

وثاااانكس حزون,,,,

المشاركة الأصلية كتبت بواسطة مشعل الغنامي

يعطيك العافيه حزووووووووووون


تقبل مروري

اللهـ يعافيكـ ميشو الحــلو

نورت الموضوع بمروركـ العسل

المشاركة الأصلية كتبت بواسطة آحسآس النويجعي

أول ماقريتها ع بالي انت ,,,,
بس امتعتني ,,,

وزين اني ماقريتها بانهار لاني انا بعد عطشت,,,,

بس ارتويت من استمتاعي بقرائتها ,,,,

وثاااانكس حزون,,,,

دووم مستمتعه

ومشكورهـ على مروركـ

نورتي ,,,