أمه ضعيفه مايذرّي ذراها 000

النفس تامرني وتتبع هواها ...... والله يامرني بأمره وينهــــا
أحيان أطاوعها وادوّر رضاها ......واحيان اخالفها واجوّد رسنها
نفس الفتى لابد تلقى جزاها......وان طاعها لابد يدفع ثمنهــــا
وان طاعها في خير ولا نهاها......يامن فشيلتها ويرتاح منهـــا
ومن دوّر الفتنه بدربه لقاها......وان ماشرد عنها قلط في صحنها
تدرج علي عينه ويدرج وراها......يطرب لحاديها وجرّة لحنهــــا
وان شبت النيران ناشه لظاها.......واليا سلم منها ينوشه دخنها
والناس عميا عن مشاهد خطاها......لو كان غطّاها الملام ودفنها
والادمي نفسه كثير ٍ بلاها......مير انشغل بمتابع الناس عنها
ينقد على غيره ونفسه نساها......قوم ٍ يعذربها وقوم ٍ طعنها
والكلمه الي مايسرك صداها......حاول تجنّبها وكلمتك صنهـــــا
وان كان ماعندك بدلها بلاها......والعاقل الي قبل تطلع وزنها
ومن يزرع الحسْنات يحصد جناها......لاحطها في جال ربه ضمنهـــا
لابد مايلقى بيوم ٍ وفاها......لادارت الدنيا وقفّى ضعنهـــــــا
ولاهي غريبه يوم تعطي قفاها......هذي عوايدها وهذي سننهـــــا
والرابح الي باعها ماشتراها......قاضب على دينه وجنب فتنهــا
واليوم زادت من فتنها واذها......والعولمه كل ٍ رضع من لبنهـا
دنيا جديده غيّرتنا معاها......تغريب للأمه وهي في وطنهــــــا
عبر الفضا بدشوش غطت سماها......تمطر على العالم وهي في سكنها
تمطر وصاختها وقلة حياها......وصبت على روس الخلايق عفنهــــا
تبدّلت معها الرجال ونساها......ضاعت مباديها وقفّى زمنهـــــا
أمّه ضعيفه مايذرّي ذراها......من عقب كانت ملجأ الي زبنهــــا
والناس ماتقطع من الله رجاها.......لو كان غيّرها الزمان وفتنهـا
لابد ماتدرك وتعرف دواها.......اليا امسكت في دينها واحتضنهـا
واليا امسكت ماهمها في عداها.......من سبها ولا بعد من لعنهـا

فهد المشهوري الحويطي