ثياب عروس

البارحه يوم الدروب غماس
جاوبت ذيب ٍ بالفلاه يحوس

هم ٍ يجاذبني والعروق يباس
وقلبي كما رمي السهام بقوس

من لا يحط أمع الرجال مداس
عليه جرد أمن السنين تدوس

والادمي لو ما ينال حماس
انا اشهد انّه بالحياه يئوس

دنياك ما تعط الوجيه مقاس
غدارة ٍ تلبس ثياب عروس

تقفي وتقبل ما تعيد تماس
تصك وان وجه العجوز عبوس

والرابح اللي ما يعيش مساس
جلْد ٍ على قهر الزمان يسوس

والطيب يبقى للرجال أساس
وكل واحد ٍ له بالحياه طقوس

اعيش وقت ٍ ما عليه لباس
وصدمات ايامي قيام جلوس

لعل ياتي للقلوب إناس
ترى السعاده ماتريد فلوس

الصمت ابلغ من كلام اياس
يا كم اتعب هالكلام نفوس

والحب ما هو بس شعور حواس
الحب خلا بالرجال هجوس

يا رب حنا بالاخير أُناس
نصيب نخطي والحياه دروس