قرأت عن شاعره رائعه ..مبدعه ..
فكيف لا وهي الشاعره
°•..•° عــــــابرة سبـــــيل °•..•°
كتلة الاحساس والمشاعر اللتي كالجبل المتدفق منه ينابيع وشلالات تسربت من بين صخور الشموخ والمعاناة ..
°•..•° عــــــابرة سبـــــيل °•..•°
من ارووووع الشاعرات بنظري
وهي التي تقول عن نفسها :
أهلي يـدرون إنـي شاعـرة
بس مايدرون في جرح الليال
يمنعوني من كتابـة خاطـرة
مادروا إني من زمان بهالمجال
آه لو يدرون اني (( عابرة ))
عندهم بتصير موتتنا .. حـلال
ولا تخلو قصائدها من الطرافه تقول عن نفسهاا
أنا عجوز مطلقـة وأم ورعـان
وأيضاً مدام وبنت وآنس وعانس
أنا بدوية وعايشه عند حضـران
وبنت البحر وأبوي زارع وغارس
أميةٍ ماتعرف حـروف وألـوان
وتلميذةٍ دشت جميـع المـدارس
ظفرة وخبلة عاقلة في نقصـان
شرود وأنطح لي ثمانين فـارس
خلوني أعيش العابرة دون عنوان
طيفٍ يمـر بلارقابـة وحـارس
وكذلك تقول في ابيات من قصيدتها :
ليه سموا صبي العين نون؟!!
لن نونك يعيـش.. بنونهـا
آه يانون..يانـور iiالعيـون
يابعـد نونهـا..وعيونهـا
وبهذا سووف ندخل الى تفاصيل هذه الشااعره وقصائدهاا الراقيه والفكاهيه واستمتعوا معي بقراءة قصائدها للنهاايه :
وهذه نبذه بسيطه عنها
عابرة سبيل (( رحمها الله )) .. شاعره كويتيه ...
l1اسمها الحقيقي وسميه العازمي( ام فهد ) من الكويت
2/ عمرها الحقيقي عند وفاتها43سنه
3/لديها اربع بنات وولدين
ولقد توفيت في تاريخ 18/ 3/ 2003م
الساعه العاشرة والنصف مساءا وقد ذكرعنهاانها انسانه طيبه جدا وهادئه وتكره الاعلام
والمفاجاة ان زوجها لم يكن يعلم بشاعريتها الا عندما اعترفت له بذلك اثناء مرضها
وزوجها هو من تولى طباعة ديوانها ورفظت
هي ان تستلم دينارا واحدا من مبيعاته وهذا دليل على روعه هالشاعر ة الطيبه رحمها الله
فقد قالت (( انا لااعصر الجرح لتفرحوا
بنزفه فهذا عذاب اخر ، بل تعصرني الجراح وتولد القصائد )) ..
ولانها صادقه حد الشقاوة كانت لعفويتها النصيب الاكبر من
الحب والاعجاب بخفه روحها (رحمها الله )
°•..•° مختارات من قصائدها °•..•
:: دنياي ::
جيت بكتب عن شقا عمري قصيده
مير عيا القـول لا ياقـف معـي
شاف همي والمعانـاه الشديـده
اكبر من القول وحـروف النعـي
هـاك يادنيـاي عمـري ماريـده
اضربيني واقسمينـي واجمعـي
اي نعم ماني بها الدنيـا سعيـده
من نهار ولادتـي وهمـي معـي
عشت محزونه وملتاعه وشريـده
وياكبـر شـي تخبيـه أضلعـي
مابي بين الناس تبكيـن وحيـده
وان هجع طرف البشر ماتهجعـي
اما موته حـق او ايـدي بايـده
هيه يارحمه الهـي .. اسرعـي
حيــــــــــــــرة .....
لا..قال ردي لي ولا.. قال روحي
لا .. هو مريحني ولاهوب مرتاح
يغيـب ويعـود يفتـق جروحـي
واذا استجد الجرح لوح لى وراح
واضحك واجامل وادعي بالفروحي
وبداخلي نار.. وتجاريح وصيـاح
واحاول اخفي جروحـي بروحـي
واخيط جرح وتنفتق عده اجـراح
وان قربت دمعات عيني تفوحـي
الله اكبر ، صار لي قلـب مـزاح
:: صبــحيه العــيد ::
ليته درى صبحيه العيد وش صار
ياهي جرت لي من عذابي هوايـل
يوم العذارى يبحن بعض الاسـرار
وجت السوالف بين قيـل وقايـل
هذي معايدها قبل وقـت الاسحـار
وهذيك صاحبها عطاهـا رسايـل
وهذي تقول انه لفـا البيـت زوار
وهذيك راحت لـه زيـاره عوايـل
وهذي تفاخر في غلا الصاحب البار
تقـول عايدهـا بكـل الوسـايـل
وانا اطالع فوق ويميـن ويسـار
بالعيد ماحتـي مشطـت الجدايـل
:: شـ اقول له:: << رائعه القصيده جدااا
باكر يجي .. ياشيب عيني من الويل
من عقـب ماسافـر سنيـن مديـه
شـ اقوله .. صاروا عيالي رجاجيل
ش اقول له ؟ .. ماني بعهده وفيـه
ان قلـت لـه تعـذبـت بالحـيـل
وان قلت له اكبـر عيالـي سميـه
يبي يعذرني ويترك القـال والقيـل
والا يـجـي ويازمـانـي علـيـه
وان جبت حظي والمقاديـر تعليـل
واني ضعيـف ورغبـه الله قويـه
يبي يصـدق كلمتـي دون تحليـل
والا يبـي ينسـف كلامـي عليـه
ش قوله لـه ؟ ماينفعـن الاقاويـل
مادمـت مانـي بعـهـده وفـيـه
:: آخر مـوعد .::<< كذلك رائعه القصيده
له موعد(ن)لاروّح الليـل ويـاي
أول وآخر موعـده مـع فتاتـه
اليوم ماتنفع دموعـه ورجـواي
اليوم تفصل عن حياتـي حياتـه
اليـوم يعطينـي بقايـا بقايـاي
وأعطيه أنا ماشلت من ذكرياتـه
اليوم بابـدّل مشاعـر حنايـاي
يصبح من أخواني وأنا من خواته
اليوم يتركنـي لحالـي بدنيـاي
مجبور يقفـي لويزيـد التفاتـه
اليوم يخلف عن مماشيه ممشاي
والله ماضمن من عذابـه نجاتـه
لو أتعلـق فيـه ماينفـع بكـاي
خلاص فات الوقت وأعلن فواتـه
اليوم بعطيه العزا عقب فرقـاي
عندي خبر وش قيمتي في حياته
وانا العزا مابيه من كبر بلـواي
ماينفع اللي عاش وأعلن وفاتـه
يارحمة الله ساعديهـم بسلـواي
يعوضـه الله بانكسـار امنياتـه
اليوم ياهمي وياطـول مسـراي
ويافرحة العذال وأهـل الشماتـه
:: أحــــــــــــــــلام ::
ياما على نفسي بالأحـلام كذّبـت
وياما صبـرت وصبرنـا مانفعنـا
وياما..وياما من وداعـه تعذبـت
وياما نحـاول نفتـرق ماستطعنـا
كم مرت(ن) ودّع وكم مرت(ن)غبت
وكم مرت(ن) عقب الوداع اجتمعنا
ياما توادعنـا وشـرّق وغرّبـت
ويوم التفتنا فـي بعضنـا رجعنـا
لاقـادره أنسـاه مهمـا تهربـت
ولامعتـرف فـي حبنـا مجتمعنـا
:: قال اسمعي ::<< انظروا الى الحس الشاعري الراقي !!
قال اسمعي..فرقاك غصبـن عليّـه
عيا الزمن يمشي معانا بالأوفـاق
وقفـت لاميتـه ولانيـب حـيّـه
تضاربت بالجوف ضيقـه وحـراق
وقال:الرسايل وينها؟؟..قلـت ذيّـه
وللريح عرضت الرسايل والأوراق
رزيـت نفسـي واتظاهـر قويّـه
يعنـي كأنـي ماتأثـرت بفـراق
أنا عـذاب الكـون صـوّت عليّـه
أضحك بسني واختم الضحك بشهاق
ماكنت أظن الليـل يمسـي عليّـه
ولاكنت أظن تعوّد الشمس بأشراق
:: الـــــــــوداع ::
قال الوداع ..وقلت له بالسلامـه
هـذي ظروفـي دايمـا جابراتـي
مسحت عبراتـي بكـف الندامـه
وتليت من كفه حوايـف عباتـي
قفى يداري عضت(ن )في ابهامـه
وقفيت اداري عضت(ن )في شفاتي
وكل(ن)رحل يحمل بقايـا غرامـه
وراحت حياته يوم راحت حياتـي
فرقاه ضامتنـي وفرقـاي ضامـه
وعلى الله الوالي خلـف ذكرياتـي
وعقب البطا أرسل عليّـه سلامـه
يطلب ويرجيني يبـي تضحياتـي
مقدرأضحـي بالشـرف للملامـه
وأمومتـي ترفـض أيتـم بناتـي
من ماحصل لقياك يـوم القيامـه
ماظن تحصل شوفتـي ياغناتـي
:: العيد باكر ::<< قصيدتها المشهووره ..!!
العيد باكر أسعـد الله ممسـاك
والله مدري وين خـدٍ جلستـه
وين انت ياللي عيدنا في محياك
كف القدر من ضيقة الخلق بسته
من يوم ما لوحت لي كف يمناك
لليوم دمعي بالخفا ما حبستـه
ومن يوم ماذوقتني حر فرقـاك
والياس زرعه في حياتي غرسته
شريت لي ثوبٍ علي شان لقياك
والثوب راحت موضته مالبسته
وشريت عطرٍ ما زهاني بليـاك
أربع سنيـن بعلبتـه مالمستـه
ودفتر قصيدٍ كل يـوم يترجـاك
مافيه يومٍ ماسهـرت ودرستـه
:: حان الفراق ::
حان الفراق .. وتم توديـع غاليـن
قسوة زمن وظروف ماهي رحومـه
وحاولت ابدّل موقف العسر بالليـن
وأبيـن قدامـه جسـور ظلـومـه
وأعاتبه وأنقد علـى دمعـة العيـن
وانا - حشـا لله - مانـي ألومـه
وأقـول هـذا حـال كـل المحبيـن
وهذا الفراق الـي تجينـا علومـه
ومسكت نفسي كن ماصايـر شيـن
أخشى على خلـي يشقق هدومـه
ثم قلت وش تنطر حبيبي لهالحين؟ !!
أثـر ايدينـي ماسكـات كمـومـه
:: وين الجديد::
يسألوني عابـره ويـن الجديـد
والاجابه ضايقـه فينـي ملـل
راحت ايام السعـاده والقصيـد
عشتها بيـن التكانـه والجهـل
كنت اروض شارد الحرف العنيد
ماعسرني لو بغيته فـي عجـل
فيه اصور لوعة الحـب الاكيـد
ومنّه(اشكل) ماحوى قلبي غزل
ومعه (اسافر) عن معاناتي بعيد
ولأجل حبه ماشحنّي من زعـل
احضنه (فرحة) طفل في يوم عيد
واسكنه (روض) الخزاما والنفل
واحتويته ليت لي (قلب ٍ) بليـد
ماعرف (فرق) الجزاله والهزل
والنهايه مابقـى عنـدي جديـد
واعذروني صارت ايامـي ملـل
"نهـــااايـــتهاا"
ترى الذبايـح واهلهـا ماتسلينـي
انا ادري ان المرض لايمكن علاجه
ادري تبـي راحتـي يابعـد عينـي
حرام ماقصرت ايديك فـي حاجـه
اخـذ وصاتـي وامانـه لاتبكينـي
لوكان لك خاطرن ماودي ازعاجـه
ابيك في ايدينك تشهدني وتسقينـي
وداعتك لايجـي جسمـي بثلاجـة
لف الكفن في ايديك وصف رجلينـي
ماغيرك احدن كشف حسناه وحراجه
ابيـك بالخيـر تذكرنـي وتطرينـي
يجيرني خالقي مـن نـار وهاجـه
سامح على اللي جرى مابينك وبيني
ايام امشي عـدل وايـام منعاجـه
اعيالي همي وانا اللي في يكفينـي
علمهم الديـن تفسيـره ومنهاجـه
أسال الله أن يرحمها برحمته الواسعه
شاعره بحق لها إحساس لامتناهي
ومعاني جميله حزينه ورائعه
وكلي أمل ان اكون قد وفقت بما نقلت وتقبلو تحياتي
[/frame]
خَـلًوُنِ أعَيش العَْابَـرهـ دَُون عًَُنـًُواًن .. طيفٍ يًَمر بلا رقابـة وحـارس
العرض الشجري