يالله انك ترحم الحال وانت ادرى بها

أقبل الليل الطويـل وبـدا هـمٍ جديـد
يالله إنك ترحم الحال وأنت أدرى بهـا.

المصايب تضرب القلب بايدٍ من حديـد
لين وسّم في فواد الشقـا مضرابهـا.

والمصايب حالها كل ما تنقـص تزيـد
ما عرفنا حلها لـو نعـرف أسبابهـا.

والأمور الكايدة قيدتنـي بألـف قيـد
مير يالله الفـرج لـو تقفـل بابهـا.

ثقل حمل شعيل يوم العرب تبغى الشديد
والعرب لا قصّر الرجل جـاه عتابهـا.

ضاقت الدنيا عسى عقب ذاك الهم عيد
سنّةٍ والخلق لابـد مـا تشقـى بهـا.

والأمل موجود والدم يجري في الوريد
لوتجي من ضرس الأيـام وإلا نابهـا.

وإلا أنا يا وجد حالي على الظبي الفريد
ماخذٍ روحي وأنا راضـي ولا جابهـا.

مقفيٍ بالروح عني وهو راسـه عنيـد
والحقوق تضيع لامن سلـى طلابهـا.

يدري إني راضيٍ بالشقا دامـه سعيـد
واثقٍ و الشك نفسـي فـلا ينتابهـا.

بالنهاية بنشده وأطلب العلـم الأكيـد
منه يوم الناس تدّي حقوق أصحابهـا.

بسألك بالله قل لي وش أنته مستفيـد
بس أبي منك الإجابة وأنا برضى بها.