يا مدعي الشيخه ولا انته لها ثوب

يا مدعي الشيخه ولا انته لها ثوب
تلبس لباس الشيخ وتقول ماهاب
زروبتن تبقى على كل زاروب
مستشيخ وهذا بلا ابوك يعقاب
شيخة كذب ترقى الى شيخة احبوب
صاير كبير القوم وتفك الانشاب
يابوصحن يابو بطن كنت مجلوب
ماتقطع القفرى ولا لجدك اركاب
صاير من اهل البل وخيام وجيوب
حرن على ضلع الوكر لكن اغراب
حولك مداشير وسرابيت وصلوب
لهطي حرامي مرتشي تاكل الداب
وتحط وجهك تحسب الوجه مهيوب
امدرهمن مدهون سيرك ونصاب
عن مثل هذي الناس لابد ماجوب
آبدل الاعتاب وتزين الاعتاب
دنيا دنيه نكبه إ لكل منكوب
وآحيسفه دنيا سواليف والعاب
راحت سوالف بين غالب ومغلوب
وتروح منا في سواليف الاعراب
يعيش فيها اللي يمزمز على الكوب
اللي يحسبنه امخلد مهو تراب
يركض بهدنيا من اشروق لغروب
ولايذكر الله ولايصلي بمحراب
وصارت على الطيب مهانات وكروب
خانتبه الدنيا وفي هقوته خاب
لا شمعه الا ايجيلها وقت وتذوب
لا زهره الا اتجف وتصير اعشاب
لا عز الا ينز ويصير مقلوب
لا بيت الا ايهد وابوابه اخراب
لاحي الا ايموت ويجيه مندوب
لا ميت الا قدمه اعتاب واحساب
نطلع من الدنيا الى الله ونؤوب
ما نملك الا اعمالنا يوم تنجاب
يالله انا طالبك يا خير مطلوب
سترك الا قصوا لنا بيض الاثياب
ويوم النصيحه دين فالنصح مرغوب
الزم صلاتك عضها عض الانياب
احذر مطايا ابليس لتصير مركوب
وتغرق بهالشهوات مع كل غباب
وخلك على نهج السلف مانت مغصوب
اياك عن دين الخوارج والارهاب
الدين ماهو بس تقصيرة الثوب
الدين دين امعاملاتك والاسباب
وياصاحبي والكذب فالرجل عذروب
والصدق ترقابه على راس مرقاب
الرجل ما يكذب ولو يكذب ايتوب
من قبل ما يكتب مع الناس كذاب
فلتر لسانك واعرف الهرج مكتوب
لتدولب الكلمات في كل دولاب
وخل الهياط بصوب والطيب في صوب
سج الخطاوي عيب مع كل هباب
وان جيت للخوه لها عدة ادروب
كانك تبيها عز خاويلك اشناب
خوة نداوي ما حكى بس يا دوب
كريم سبلا طنخ كساب وهاب
مايعرف النمه ولايطري اغيوب
وان جاه ضيفن لا تمذرى ولا هاب
راع الصحون اللي به السمن مصبوب
راع القهاوي وازرق العود شباب
وكانك تبيها خوة العيش والروب
دور على خوة سرابيت واذناب
يا كثر ماشفنا مثل خوّة اكلوب
وادين ما تندى تقل عود لزّاب
اما تجي الخوه على راس عرقوب
ولى الخلا ياسع صحاصيح وهضاب
واللي يقول الحق فالوقت مسبوب
ماغير قوله لو على قطع الارقاب
والناس فيها عيوب وفي نفسك عيوب
غسل على حالك ولاتصير معياب
لاتحقر العالم ولا تجرح قلوب
واطلق حجاجك للجماعه والاجناب
خل صدرك اوسع لاتضيق بك اخطوب
وادمح لزلات ابن عمك والاقراب
وان جيت في مجلس ولاتملك اسلوب
اياك لاتسولف ولا تصير عتاب
ترى السوالف بين الاجواد ترتوب
ماهيب عند اهل السواليف مزراب
اتعب على هرجن اموثق ومتعوب
واترك كلام النفس وهروج الاعجاب
خلي طناويح العرب وقت لحروب
سولف سوالف تبهر عقول الالباب
البعض وده مربط وسلك وتيوب
من هذرة لسانه ولا عنده اداب
ولتجي على دعوى اذا منت مطلوب
اللي يدز خشمه جلس دون ترحاب
واللي مهو بين الرجاجيل محسوب
كبه ولا تحسب لخيباته احساب