عفن فضائي
كنت واقف عند اشاره من الاشارات اللي توجع القلب وترفع الضغط والله عالم متى حيشوفولنا حل في هادي الاشارات... المهم خلونا فهرجتنا كان في سيارة جنبي فيها مجموعه شباب من ابو بكله وطيحني رافعين صووت المسجل على الاخرعلى اغنيه عربيه هايفه قلت في نفسي (يابخت الاصنج) قالتلي ام فتو هادول الشباب ما يستحوا ولا يحترموا الناس كده مشغلين المسجل على الاخر قلتلها يا ستي هدا اللي جانا من القنوات الفضائحية الهايفه اللي دمرت شبابنا وبناتنا دمرت اخلاقهم ماعاد صار عندهم لا تربيه ولا دين ولا صحه ولا حتى فكر ولا ثقافه حياتهم صارت تقليد في تقليد على الفاضي والمليان والمصيبه الكبيره انه اغلب اصحاب هادي القنوات الفضائحية للاسف عرب ودافعين فيها ملاييين الدولارات عشان ينشروا هدا العفن اللي بنشوفه في كل القنوات وبعدين ايش ديتها هادي القنوات التافهه كل من هب ودب جا وسوى قناة كل الحكاية شقه بالاجار ومجموعه رجال تافهين عاطلين وبنات عندهم امكانيات وهات يا مسخره ومرقعه واسمعلك من هادي الاغاني الهايفه اللي مالها لاطعم ولا معنى هدا غير الشريط الفاضح اللي بتشوف فيه كلام الواحد يستحي انه يقولوا ... من جد قنوات صارت زي المراقص والكبريهات كل اللي تشوفوا استعراض فاضح ياناس عيب والله عيب هدا اللي قاعد بيصير استحوا شوية خلو عندكم دم .. هدا غير البرامج التافهه اللي بتعرضها هادي القنوات لا وفي قناة كميراتها شغاله 24 ساعه على غرف النوم عشان يطلع واحد والا وحده ويفوز بالمركز الاول عشان صوته يقولوا انه حلو (ان انكر الاصوات لصوت الحمير) وعاد شوف المشاهدين اللي بيتفرجوا على هدا البرنامج ويصوتوا لزعيط ومعيط ونطاط الحيط وفي الاخير كع يا بعلي وادفع الفاتوره ... قنوات جابت من الشارع ناس بيقولوا انهم يعالجوا اصعب الامراض رغم انه الابحاث الطبية لسه ما لقيت لهادي الامراض علاج وقنوات سمحت لنفسها انها تتكلم عن امور الدين والدين منها بري وقنوات ما عندها شغلانه الا الكلام في السياسه الين ما زرعت الحقد والكراهية بين الدول والشعوب عشان كده بقول يا وزراء الاعلام العرب الله يرضى عليكم شوفوا لنا حل في هدا العفن الفضائي اللي دمر حياة شبابنا وبناتنا وعشان كمان نقدر نحافظ على الاجيال الجيه بعد كده وعيشوا كتييير تشوفوا كتييير
بقلم /فتحي علوان***********
عفن فضائي!!!بالبلدي الفصيح
العرض العادي
