رسوم البر والعنّه

يقول من زوّد الفنجال في بنّه
واطلق سراح الهوى والنفس مصدومه

ما عنده الا رسوم البر والعنّه
وطير ٍ على شبته وعيون مريومه

يسحب من الضو جمرات ٍ يدفنّه
البشت فوقه وبرد الليل وغيومه

الذيب عوّى ولج الصدر بالونّه
ما كنّه الا جيوش القهر مهزومه

يضرب كفوفه ودمعاته يعزنّه
وش عاد لو ملّت الاصحاب من لومه

يعض روس الشفايا في طرف سنه
يطشّ عنه الغطا ويصحصحه نومه

يذبّ عشر الزقاير ما يهدنّه
والعشر الاخرى يهدن حيل بلعومه

الدمع يسكب وقيفانه يسلنّه
علها تخفف جروح القلب وهمومه

مجنون ليلى وليلى خيّبت ظنّه
قومه يحبها ولكن عاد وش قومه؟

وانا احسّه امل ابليس في الجنه
ولكنّ حبي عليه النفس مفطومه

الفاتن اللي عيون عناد حبنّه
القلب داله يسج وتاخذ علومه

الي كثير العذارى ما يساونّه
اللي بثغره عبير الورد ونسومه

حتى عيون البراءه ما يكفنّه
عيون سحر ٍ يخج القلب بسهومه

منه انتشى العطر؟ لا والله بدى منه
متفرعن الورد بين اوراق قيصومه

او ياسمينه تغني من طرب فنّه
او نرجسيه تعانق عود يشمومه

حواسه اليا انطقنّ بالحسن يعطنّه
وقيثارة العشق تعزف لحنّ منظومه

يكسي البراءه بثلج العطف والمنّه
ويرفل بثوب الطفوله ويرسم احلومه

بل فيه كبر الملوك سيوف سلنّه
متسلط ٍ فوق عرش القلب ونجومه

وطاووسه اليا مشى متبختر ٍ كنه
يجر طرف العبايه معلن اقدومه

وبين السحابه وارض الحب والجنّه
كني اشوف الحيا يختال بهدومه

لا فرع البرقع أرموشه يظلنّه
مثل عين الوحش لا يدرع بحومه

منه اشرقت شمس حبي ومغربت عنّه
اسفر صباحي وشعشع من على ارسومه

هذي المشيئه ولكني ولكنّه
رغم المسافه نعيش بحُب ديمومه

وهذا انا كل ما فيني سأل عنه
ياليت حتفي ويومي من قبل يومه

يا ناس سود اليالي وين ودنّه؟
والله حياتي بدونه شبه معدومه

ما دام فيني ضلوع القلب يغلنّه
والله لقزر العمر لعيون مريومه