وصدمات عمري من البدايه أليمه

هذا وعمري ما وصل حد الزحام
وصدمات عمري من البدايه أليمه

وقالت لي امي وانت في سن الفطام
ما تحسدك غير العيون العظيمه

ونسيتها كلمه وانا اعد الايام
ما كنت جاهل يالقلوب الرحيمه

واليوم اشوف رجال ما تلزم لزام
مستغشمه بالفيت ولى غشيمه

ما قول انا بلجم الحصن بلجام
لكن من يخطي يواجه خصيمه

وكل(ن) يشوف الناس في عينه احجام
والزود ما يشفي القلوب السقيمه

لو كل رجل يدير الامور بزمام
ما ضاعت الحكمه بناس(ن) سليمه

ولو كل رجل(ن) نوخ اركاب لنظام
ولضاعت الدنيا وصارت رجيمه

وعشان لا اندم ولا عيش بحلام
ماعدت اجامل بالصفات العقيمه

رجال تكرمها كرامات الاكرام
ورجال ما تكرم ولا هي كريمه

ورجال تحشمها لجل ناس(ن) حشام
ورجال ما تحشم لحاها حشيمه

ورجال تفداها ولو تحكم اعدام
ورجال ما تشره عليها بشيمه

ورجال تاصف زلتك بم الآثام
حتى الخطا منك يسوى جريمه

ورجال تتفلسف ولا عندها المام
ولو تدعي بالفهم ماهي فهيمه

أحد(ن) توهم به وهو كله اوهام
وده على غبنك يعد الوليمه

واحد(ن) تقضب به ولا يشد الحزام
عيده الا شافك بليا عزيمه

واحد(ن) ذخرت لضيم بقعه ولايام
ويوم(ن) زهمته جر ذيل الهزيمه

واحد(ن) توهق به ولا يرده اخطام
تنهزرك بين الرجال الحكيمه

ان جيت له بالنصح ثور بك الغام
وان جيت له بالطيب تصبح غريمه

ما يستحي دام الحيا قل وانضام
يا هي ظليمه ما بعدها ظليمه

اللآش لآش وتقرب اللآش تنلام
واللآش ما يعطي الرجاجيل قيمه

ما نشرب الفنجال من كف الخمام
سوقه على غيري صفاته ذميمه

لا بيننا عرف(ن) ولا بيننا خصام
ولا هي بتربطنا علاقه حميمه

كانك تدور الهرج يا مسرج اولام
لانيب صيد لك ولا ني غنيمه

عند العرب عند البدو عند الفهام
يمد باليمنى بحشمه وشيمه

والله لولا سعيد هو قرم واسنام
اني لكبه والعواقب وخيمه

ورجال تفداها ولو تحكم اعدام