{ خذها معلومة فقط [ بطاريات اللاب توب و غيرها ][ مهم ]‎

عزيزي المستخدم :
هل تعرف مكونات البطارية وطريقة عملها؟!
هل ودك تعرف طريقة الإستخدام الصحيحة للبطارية؟!
هل ودك تعرف صحة النصائح اللي نسمعها دايم؟!
وهل تعاني من مشاكل بطاريتك وإنها ماتقعد إلا ساعة أو أقل؟!




طيب وش أسوي لك؟! هذي مشكلتك موب مشكلتي
<< مريض




فيه شي مهم لازم نعرفه في البداية ، إن البطاريات نوعين : نيكل و ليثيوم !
النيكل كانت تستخدم قديماً ، قبل تقريباً سبعة سنوات ، لكن المستخدمة حالياً
والموجودة في أجهزتنا المحمولة والهاتف الجوال هي الليثيوم.


أقدر أشبك سلك الشاحن والبطارية موجودة في الجهاز؟!

نعم تقدر .. لأن بطارية الليثيوم في تصميمها الداخلي يوجد فيها
حساس وشغلته إنه يفصل الكهرباء عن البطارية إذا اكتمل شحنها!.

الحساس في البطارية زي الغطاء للعلبة ، تخيل لو عندك علبة
وتعبيها موية مثلاً ، الطبيعي إنه إذا امتلت بتوقف وبتغلقها بواسطة
الغطاء ، لكن لو مافيه غطاء واستمريت تعبي وتعبي؟! الحاصل إن
الماء بيزيد ويفيض عن العلبه وهذا اللي يصير مع البطارية ،
لو إن الحساس غير موجود ( الغطاء) والبطارية قاعدة تتعبى
من سلك الشاحن ( الموية ) اللي بيصير إن الشحن بيزيد وبتزيد
حرارة البطارية لأنها اخذت طاقة أكبر من قدرتها وبالتالي ستنفجر !

لكن في بطارياتنا الحين ودام الحساس يعمل بشكل صحيح ، فيمكنك
وضع البطارية وسلك الشاحن سوا في الجهاز لأن الحساس تلقائيا إذا
وصل شحن البطارية 100% بيفصل عنها الكهرباء ، والجهاز في
هالحاله بيستهلك شحن من السلك وكأن البطارية غير موجودة !
يعني البطارية وسلك الشاحن متفاهمين سوا لا تشيل همهم

طيب هل شحن البطارية وهي لم تفرغ بعد يؤدي إلى إتلافها؟!

الكلام هذا صحيح لكن في بطاريات النيكل فقط! ، لكن بطاريات الليثيوم
مختلفة وتقدر تستخدمها بدون ضمير ، تقدر تشبك الشاحن والبطارية
فيها مثلاً 40% يعني توها مافضت ، للتوضيح أكثر ناخذ مثال سريع:
الحين إذا جيت تطلع مشوار طويل ، وبطارية جوالك مافيها إلا النصف
بس بطبيعة الحال واللي نسويه كلنا إننا نكمل شحنها ، ونلاحظ إن بطارية
الجوال ممتازة وعمرها طويل ، مع إننا نسوي هالحركة ولا ننتظر البطارية
تفضى ! ، بطارية اللاب توب - ولأنها نفس نوع الجوال " ليثيوم " - تقدر
تسوي فيها نفس الشي ، وتشحنها وهي توها مافضت بعكس النيكل اللي
تخرب لو شحنتها شحن جزئي .


هل صحيح إني لو أشيل البطارية وأشتغل على سلك الشاحن أفضل لجهازي؟!

هذا صحيح قديماً في النيكل .. لكن الليثيوم ماينفع إنك تشيلها فترة طويلة
لأن هالشي يضرها ويقلل من عمر الإستهلاك اليومي لها .. مثلاً
لو عندك وردة ( للأسف وصلت هالمرحلة من التشبيهات هههههههههه)
عندك وردة في حديقة .. ولا أسقيتها موية فترة من الزمن .. تتوقع إن
الورده بتعيش؟! .. طبعاً لا ( معلومة جديدة الصراحه ) ، وبطارية
الليثيوم نفس الشي .. إذا قعدت فترة بدون شحن (شحن = ماء) بينخفض
أدائها بشكل كبير!

وهذا يقودنا لنقطة مهمة وهي عمر البطارية !
البطارية لها عمرين : العمر الإفتراضي + الإستهلاك اليومي ..
الإستهلاك اليومي: وهو الوقت اللي تقضيه يومياً في استهلاك البطارية
فيه ناس تقعد بطاريتهم 3 ساعات وفيه ساعتين وسبب هالإختلاف
بنعرفه فيما بعدين

العمر الإفتراضي :وهو عمر البطارية منذ تاريخ إنتاجها إلى انتهائها
وهي لها عمر محدد ولا له علاقه أبداً بطريقة استخدامك لها والعمر هذا
غالباً يكون 3 سنوات .

وفيه ناس تتوقع إنها لو شالت البطارية من الجهاز ولا استخدمتها
بيطول عمرها الافتراضي .. طبعا هالشي خطأ .. وللتوضيح ناخذ مثال
هالحين اللبن لو شريته ( ياشين اللي يكتب موضوع حزة الغداء)
اللبن شريته اليوم مثلاً .. وتاريخ إنتهائه بعد أسبوع .. ولنفترض إنك
حطيته في الثلاجة وهو جديد .. ومر أسبوع وانت ما أستخدمته أبداً ..
هل تعتقد إن اللبن موب منتهي وبيبقى صالح للإستخدام عشانك مافتحته؟!
طبعاً لا .. هو له تاريخ محدد ينتهي فيه بغض النظر إنت استخدمته أو لا ..
بطارية الليثيوم زي كذا برضه .. تموت بعد تاريخ إنتهائها .. لذلك انتبه
لتاريخ الإنتاج إذا جيت تشتري بطارية جديدة .

الزبدة إنك مستحيل تطيل العمر الافتراضي لكنك تقدر تزيد عمر الإستهلاك
اليومي وهذا اللي عليه العلم

طيب كيف أزيد الإستهلاك اليومي؟!

طبعاً البطارية في تركيبها الداخلي تحتوي على خلايا cells وكلما زاد عدد الخلايا
زاد عمر الإستهلاك اليومي .. يعني نسمع إن بطاريات تقعد ساعتين وبطاريات
ست ساعات هذا كله سببه عدد الخلايا .. وعدد الخلايا في البطاريات أنواع :
4 خلايا - 6 خلايا - 8 خلايا .
وأكيد كل مازاد عدد الخلايا كل مازاد سعر البطارية + أدائها .
وتقدر تطلب البطارية بـ 8 خلايا من وكيل الشركة اللي شاري منهم جهازك .

طيب الحين نجي للسؤال الأهم واللي يشتكي منه الكثيييير وهو أساس الموضوع

يقول لك أنا شريت بطاريه تقعد 4 ساعات .. بس إنها ماتقعد معي إلا ساعة بس
وتخلص .. وين المشكلة؟! .. أرشديني يا فوزية الدريع

المشكلة هي قيامك بفعل أشياء تستهلك من البطارية كثير .. والنقاط التالية
توضح الطريقة الصحيحة في استخدام البطارية " الفقرة هذي مهمه جداً
وتطبيقها يطيل عمر البطاريه ( شخصياً يوم طبقتها صارت بطاريتي تقعد
ساعتين ونصف بعد ماكانت تقعد ساعة وربع ! )

[ 1 ]
الخلفية
ألوان الخلفية الفاتحة والفاقعة تستهلك كثير من البطارية لأنها تاخذ أكبر
قدر من الألوان والبكسل ، حتى الخلفيات المتحركة واللي فيها تصاميم
تحتوي على ألوان فاقعة ورسوم كثيرة ، هذي تستهلك برضه!
بالعربي يفضل إن خلفيتك يكون لونها غامق وبدون صورة يعني
إقلب جهازك عزاء

[ 2 ]
سطوع الشاشة
ومعروف إنه كلما زاد السطوع زاد الإستهلاك للبطارية ، لذلك يفضل
التقليل من السطوع وطريقتها إنك تضغط زر fn مع زر f6 وطبعا
تختلف من جهاز لآخر بس المهم إنك تضغط زر fn + زر مرسوم
عليه شمس وسهم لأسفل

[ 3 ]
تشغيل عدة برامج
المستخدم اللي يفتح ثلاثة برامج وكم صفحة نت ، وفاتح الماسنجر
يبربر ولعبة يدهر عليها وملف صوتي يسمعه وبعد كل هذا يقول ليه
بطاريتي خلصت بسرعة؟!
خلصت لأنك استهلكت البطاريه كثيييير ، برضه إذا كنت شابك هارديسك
خارجي أو فلاش - طابعة - ماسح ضوئي - سي دي ، المقصود أي
جهاز خارجي مشبوك مع جهازك بيستهلك من البطارية .

[ 4 ]
عملية إغلاق جهاز الكمبيوتر تستهلك بطارية!!
الحين إذا قفلنا الجوال وجينا فتحناه عقب ، نلاحظ إن البطارية نقصت!
الشي هذا موجود حتى في اللاب توب ، لأن استهلاك الطاقة مايوقف
توقف تام ، طيب كيف أحل هالمشكلة وأخلي الاستهلاك يوقف بمجرد
إيقاف التشغيل؟!

الحل : إبدأ > تشغيل > نكتب " regedit " > بيفتح لنا نافذة محرر
التسجيل وفيها خمس مجلدات > نفتح المجلدات التالية بالترتيب :

HEKY-CURRENT-USER
Control Panel
desktop

بعد مانختار الأخيرة بيفتح لنا في الجهه الثانية " على اليسار " عدة
ملفات ، نبحث عن ملف اسمه " power off active " ، نضغط عليه
باليمين : ونختار تعديل ، نغير القيمه الموجوده من زيرو إلى واحد
بعدين موافق
وبعد كذا بنلاحظ إن البطارية تصير محفوظه ولا تنقص بعد الإغلاق.

[ 5 ]
البرامج اللي تكون تحت عند الساعة وتكون مفتوحة ، هذي تستهلك
من البطارية لذا يفضل إغلاقها عند عدم الحاجة إليها .

[ 6 ]
المواصفات
طبعاً كل شي زين له ضريبة ، وضريبة المواصفات الزينة للجهاز هي
استهلاكها الشديد للبطارية ، والمواصفات يقصد بها مواصفات الهارديسك
والذاكره والمعالج .

[ 7 ]
الواير لس
الأشياء السابقة ممكن تكون معروفة لكن اللي قليل يعرفونه وكان يقوله
( المهندس إسلام عبد الحميد في برنامج حياة تك ) إن البلوتوث
يستهلك من البطارية ، لأنه يشتغل على الواير لس ويظل طوال
الوقت يبحث عن أجهزة حوله ، لذا ينصح إنك تقفل البلوتوث بعد
ماتستخدمه على طول .