تجارب الايام

[poem=font="*6**normal*normal" bkcolor="transparent" bkimage="" border="none*4*" type=0 line=0 align=center use=ex num="0*black""]
ياالله ياعالم خفيات الاحوال=يامنزل غيث المطر من غمامه
يارب تهديني على خير الاعمال=واجعل لنا حسن العمل في ختامه
يامنزل يونس وطه والانفال=يارب تهديني طريق استقامه
دنيا تغير كل يوم لها حال=وياسرع لفات الزمن وابترامه
ومن لاحسب دنياه باقفاى واقبال=ماينفع الندمان عضة ابهامه
والعمر يمضي بالتمني والامال=والرزق عند اللي رفيعٍ مقامه
وكثر الحذر ماينفع العمر لوطال=ولابدله من يوم يبلغ تمامه
ويصير في قبر من الرمل ينهال=وحيد في قبر شديدٍ ظلامه
ويشوف ماقدم ولوكان مثقال= في ساعةٍ مايفيد فيها ندامه
ويوم اللقا ماينفعه مال وعيال=ويقرا كتابه في يدينه امامه
اما نعيم بجنة الخلد مايزال=والاجحيم مايطفى ضرامه
ومن جرب الدنيا توريه الاهوال=والعاقل اللي زاد منها افتهامه
واليوم باكتب ماطرالي على البال=امثال من درس الزمان وعلامه
تجارب جربتها قول وافعال=ماهي خيال عايش في اوهامه
ثلاث من هو حازهن حاز الافضال=ومن دور الطولات شدن حزامه
الدين ثم الجود والثالث المال=يرقى بهن للمجد عالي سنامه
والوالدين اللي لهم ةقدر واجلال=ياكبر واجبهم وكبر التزامه
والضيف له ترحيب مع طيب الاقبال=وزود على الترحيب طيب ابتسامه
والجود من الماجود في كل الاحوال=ومن جاد بما جوده كفاه الملامه
ومن لابذل جهده بدنياه واحتال=ماتجيه كسبات المراجل كرامه
ومن يفعل المعروف يجزى بالامثال=ومن يحترم نفسه يزيد احترامه
والطيب له بين الاجاويد مدهال=تلقاه في وجه الفتى له علامه
ومن دور المعروف في بحر الانذال=لايدوره قدام يوم القيامه
وترى رفقة الانذال فيها غثى بال=ومن رافق الانذال جاب الملامه
والنذل لايعجبك لوقيل رجال=تراه مثل الطعس سهل انهدامه
والى جهلت الرجل قيسه بماقال=وينبيك عن خافي كنينه كلامه
ومن يحفظ لسانه عن القيل والقال=يسلم من طعون الكلام وسهامه
وان مالقيت لكلمة الحق مدخال=الصمت في بعض المواقف سلامه
وبعض العرب ثرثار مجلس ونقال=متخصص بهرج القفى والنمامه
يوزع اخبار الناس طيب وبطال=واكثر علومه روجتها مدامه
وبعض العرب لنه لبس بشت وعقال= تقول هذا من رجال الزعامه
هريج مجلس ماوجد مثله امثال=وعند اللوازم ماتشيله عظامه
وبعض العرب عبيد مال وعمال= مافرقوا بين الحلال وحرامه
يركض ورى الدنيا ولاارتاح له بال=ويروح عنها ماتحقق مرامه
لاهو كسب دنياه ولاالاخره نال=واصبح وجود المال مثل انعدامه
وبعض العرب للناس غيث ومدهال=ريف الضعيف ان جار دهره وصامه
ماكنه الا الضلع راسي على الجال=وعنده على الشدات عزم وصرامه
والمرجله ماهي على كبر الازوال=ولافاد كبر الجسم عقل النعامه
وصبرك على الشده ولابعض الاذلاال=لن الزمن زود عليك احتكامه
والحاجه اللي الناس لو كان بريال=امر من الحنظل خبيث طعامه
والدين هم ومن ثقيلات الاحمال=كم احرم المديون لذة منامه
وفقر بلا دين غناة بلا مال=الى ارتحت من هم الزمان وسقامه
وشرب الضمى عالكبد عذب وسلسال=والجوع هو لذ الطعام ويدامه
والله خلق في الناس عاقل وجهال=والقاقل اللي ماتزله اقدامه
وانا كتبت اللي طرالي على البال=وياسمعين القول هذا ختامه
وصلاة ربي عد ماهل همال=وعداد مايلبس ملبي حرامه
على شفيع الخلق في يوم الاهوال=محمد شفيع الخلق يوم القيامه
[/poem]الشاعر:سعيد عوده شداد الحويطي