تعتبرها ذنوب !

متصور ان قلوب تكسر كثير قلوب
لكن عرفت الحر ما يخلف عهوده

على نسيج الشرنقه والحرير يذوب
كنه فراشه توها جت مولوده

قامت تمرجح هالهدب والورق والثوب
يسدل على الخصر المورد وعنقوده

تنثر دياجيرك على شعرك الخروب
وتشتت البكلات وتحرر قيوده

كنك رحيق الريق يغسل شفايا الكوب
أو غيمة(ن) تنثر مطرها على وروده

تختال هالشامات في وجهك الحبوب
وتجدف ارموشك ورى عيونك السوده

لا هي شروق ولا ستاير و وقت غروب
تسحر وسحر الهدهده يحضن النوده

كل الذنوب اتوب وأهيا محال اتوب
كنها سكاكين(ن) على القلب مسنوده

وش هو جديدي دام ما ينفع المكتوب
نفس المشاعر والاحاسيس موجوده

تسقط ليال التيه وتشقلب الشقلوب
يهزها الذعذاع من طحطحة عوده

ويبلى جدار الطين واجمع رفات الطوب
وابني كرات الحب بعصاب مشدوده

وعلى شواطي دمعتي بسكب المسكوب
أدحرجه والقى مع اسهوده امهوده

أقلبه حتى اشوفه بهالمقلوب
لو ان فرحاتي معه شبه محدوده

ما جبتلك اعذار ولا قلت لك عذروب
واظن هالزلات ما هيب مقصوده

الريح وش حده على شجرة الدالوب
ينثر ورقها قبل ما تصلخ جلوده

على المحك الروح من قسوة الرعبوب
ودمعي يجدف آآآآآه وآآآآآأه ممدوده

لو انها كل البشر تملك الاسلوب
ما شفت بالدنيا متاهات مسدوده

علموه مو كل البشر طيبين قلوب
ولا كل كاهن يفهم احكام تلموده

يا صاحبي مثلي من الناس دوبه دوب
قطر عليه الغيم ما بيح سدوده

قصه شراع الوقت عن وجهك المحجوب
وجرت عصافير الوله حزن تغروده

وش يجبرك تمشي على امره المغلوب
الا اذا ثلج الشتا أسود (ن) ذوده

دامك تقول ان طيبتي تعتبرها ذنوب
انا اعتبرها صفحة (ن) فيك مفقوده

يا طيبتي صرتي عيوبي بدون عيوب
وكل الصفات الطيبه فيتس محموده

لكن كذا الممنوع دايم يجي مرغوب
وكل لاجي (ن) منا له الحق في العوده

متصور ان قلوب تكسر كثير قلوب
لكن عرفت الحر ما يخلف عهوده