تعودت الصباح اقوم وانفخ هفففف ع الفانوس
صباحات الغلا كله واشوف الحب في عينك
وتحكي لي صباح الخير وتتغلا وتجي واتبوس
ترنح بين يديني وتطيح اشوي من لينك
حلو لون الصباح اليا انغمس في خدك المغموس
عطر يسمين والجوري يهدهد في بساتينك
حلو نفس المكان اللي جمعنا والغلا محسوس
وحلو فنجال قهوتنا وقولة تسلم ايدينك
يليتك قبل ما تقفي / على قلب العناد ادوس
بدل ما عاندك وارم التهم بالوجه وآدينك
اعرف ارواحنا تصعد كأنها بجنة الفردوس
على آخر نفس فيني بشب اشموع تأبينك
انا والله وصلت لمرحلة شيخ ٍ بدون افلوس
وأي افلوس هي اغلا من اللي بيني وبينك
وانا ماعاد تشبعها عيوني ريشة الطاووس
ولا حاجه بهالدنيا بدون اقلام تلوينك
بعد عامين لغيابك افز اقول شالكابوس
وانا ما صدقت عيني تناسا بهجة اسنينك
وتخنقني مع الشهقات شهقة من بلع هالموس
أتأتأ في حروف اسمك وانادي وينك و وينك
لك الله كل ماحان الفراق ودق هالناقوس
يذكرني منبه ليلة ٍ تصحى على زينك
وانا وش طالع بإيدي ماغير الهم والهاجوس
إلى ما شفت مدخانك وشماعة فساتينك
اذا معنى كلامي ما يعلمني الحبيب ادروس!!
انا اتعلمت يا قلبي تحمل والله يعينك
شموع تأبينك
العرض العادي
