القطار

الحياه صارت حداثه واباحه وايتكيت
والعصر شوكه وسكين يا اطوال العمار

شفت شي ٍ ما يسولف وانا منه استحيت
مجتمع يرم العوايد كذا بعرض الجدار

كل ما أقرأ لإيه تنورت وبكيت
سورة النور العظيمه من احجاب وخمار

يا خساره ما بقى للمراجل أي صيت
والعلوم الغانمه يا عرب صارت شعار

وانمسح وجه المعاني مثل مسح المكيت
والمبادي بدّلوها يبون الاختصار

لو صبت كل العرب للإباحه ما صبيت
ولا أبدّل اسم ديني بإسم ٍ مستعار

البنات اليوم صارن على قمة حفيت
اسنمة بُخت وخلاخيل يا عالم دمار

المرى صارت رجل والرجل اصبح يبيت
وقت خدّامه وجوال يعطيك انتظار

والشباب الله يعنيه غدا صلصل وزيت
من ثياب ٍ خصروها على داير مدار

بنطلون الجنز ساحل الى طرف الجكيت
والشعر واقف كذا مثل آذان الحما...

ما يغار الرجل من عقب ما هو مستميت
غض طرفه مات قلبه رضخ لآخر خيار

مصخوّنا مع شكيرا واحلام وجوليت
واشغلونا بالكُره والشعر والانكسار

يا جحا مسمار حرصك وصل مليون بيت
اشهد إنه عند خشمك وفي وضح النهار

البطون ابذور تزرع وتحصد ما جنيت
والولد وان طاب راسه فمن طيب البذار

شاش راسي لابن عمي وجيته وانتخيت
وان تردى ما زهمته وعاكست المسار

يا محطه احتريها من الوضع المميت
انشدوا راع المحطه متى اوصول القطار


القطار هو الموت