اطلال بيته تسائلني عن اخباره

خارج حدود الزمن و الوقت و اسواره
وقفت حاير مع الذكرى و طاريها
مرّيت صدفه على بابه على داره
زلة قدم يوم ساقتني خطاويها
سرحت بالفكر اناجي القلب و اسراره
قمت اتذكّر حبيبٍ لي سكن فيها
شفت الدريشه تعانق قطعة ستاره
بالحان حزنٍ على النسمات تشجيها
و اطلال بيته تسائلني عن اخباره
تقول لي حيل مشتاقه لماضيها
دخلت شفت الرسوم و باقي آثاره
حينه طرى الوشم منقوشٍ باياديها
لقيت علبة قديم العقد و سواره
تقول ياليتني معها مخاويها
نفضت عنها شحوب الوقت و غباره
و قبّلتها قبلةٍ بالحيل مغليها
و هلّت دموعي على الخدّين مدراره
تبكيه لو كان ناسيني و ناسيها
عقب رحل بي حنيني و طيفها زاره
رجعت تايه مع الذكرى و داعيها
و ادوج في كل يوم اقوم بزياره
و أمرّ داره و اصبّحها و امسّيها
أحب داره و سكّتها مع الحاره
و احب جيرانها و اللي يواليها
والوم من لامني في الدار و جداره
حيث ان قلبي عشق من كان راعيها

قمر الشمال
يسلمووووووووووووووو

[align=justify]
جميل ما طرحتي ..
ذائقة متميزه كا العادة ..




الذيب
[/align]