راكب اللي لا نخيته حطم اجزاء الثواني
مثل شيخٍ حضروه القوم لطقوس الحميه
جيب لكزس كن لونه خلطةٍ من زعفراني
أشقرٍ عودي عل اصفر المهم أنه كذيه
صب لونه وسط قنينة ذهب والعلم جاني
وارسلوه لطوكيو ثم جاب ميه فوق ميه
.
راحو يساقون بديه واطلعو في لون قاني
ثم أعادو مره أخرى لين صار افتح شويه
واتركوه اليوم كله وارجعو له وقت ثاني
وجاك لونه مثل لون الشمس حزة مغربيه
وركبو له شمعتينٍ تكسح سهيل اليماني
كن شاشاته حفل شيخٍ قصاصه صار ديه
وفرشوه بزل نادر أجود أنواع الايراني
والمراتب هولويز وبالمقابض جلد حيه
وصمم الديكور عودٍ مفتقد بعض الحناني
عود واستشرق شبابه في شواط اللاذقيه
هو صحيح أنه يهودي لا خصال ولا معاني
ولاتذكر مامضاله عند ذيك وعند ذيّه
شب غليونه وولع كالبواخر بالمواني
ودار مكنون الخيال المنغمس بالنرجسيه
جاب من فندق جميرا ودمجه مع جو كاني
وحط من جفن الغياب اللي نعس في ماربيه
وين مالديت عيني طاري الفرقا طواني
صب فيه من الحنان الى الامور العاطفيه
ايه شاعر وادري أن الوصف هذا مارواااني
داخليه بيت واحد بس يوصف داخليه
داخليه عين بنتٍ ساهره للأمتحاني
من الفلاحه ورطوها بالفصول المدرسيه
وطعم الطبلون عاج وقـ حـ ويان وسندياني
وصبو الكمبود رأسا بالتروس الاوليه
كل ماجارو عليه يفوح عود وقـ حـ وياني
فوح عطارٍ جرحني وسط سوق العقربيه
كن زوله زول شيخٍ معتلي صهوة حصاني
وكن شبكه صدر قيس اليا نهت بالعامريه
نوع خاص من السفاره ما يشيك بالمواني
سجلوه الدبلوماسي واختمو له بالهويه
الوكاد أنه غريب ولو لحق ماض الزماني
كل شيخٍ يعتزيبه لاعرف ذمة خويه
وسط جوفه قاري الاقراص لاهل القٌرآني
يكفي الله شر من نفسه على الحاجه دنيه
ياصديقي دق سلفه يوم وجه الصبح باني
ولاتعبث بالازره خص هالاحمر هذّيه
خوفي أنك لاضغطته يقلع لدار اليباني
لانه احيانا يحن أحنان خلجٍ دوسريه
سم بالله وتوكل واربط أحزام الاماني
سج طبلون على أخر روووح والنيه مطيه
هاك خارطة الطريق وهاك خارطة المباني
وانتبه للنقطه اللي من هنيّه لي هنيّه
ياوجودي لاتهزع مع رفاع ومع طماني
وجد من طشه زمانه في برستيج بدويه
سعد عينه يوم قالت أنت راع الاشقراني
وابتسم بسمة عزيزٍ خابر أحواله رديه
يستر فجوج الزمان اللي عليهم شقلباني
ولد ناسٍ راح عمره في هوى بنتٍ غنيه
اورثت ورثٍ عظيم وغردت ياليل داني
واسكنت حي العليا عقب حي الناصريه
واشترت جيبين لكزس راهيه والعمر فاني
كل ماجيت اتميلح ولت اتكشخ عليّه
وكل ماهل الربيع من الزهر والأرجواني
طقت مخيم لاهلها في طعوس العاذريه
مشعل بن جريد....
راكب اللي لانخيته حطم اجزاء الثواني
العرض الشجري