سلام يامن بالصمود استعظمت فوق الصمود
ترقا سنام الطايله قمة شموخ امجادها
في ذمتي ما للعديد اية وجودن بالوجود
الا انت ياللي ديرتك كان العدو هدادها
ابطال غزه كلهم اللي تحدون اليهود
انشهد ان المرجله هم ربعها واسيادها
ابطال هبت كلها حتى عن احماها تذود
تستقبل الموت بعزم من دون رمل بلادها
ياغزة العز الأبي يا حاشده شعبك جنود
جنود واسلاحك صبر قلب الصمود ازنادها
لنه احضن ارضك شهيد استموت الباقي حشود
وجّيوش صهيون اللعين مهيمنه بعتادها
ياجود ذا مخرز ردا مايخترق كف الاسود
كم خنجرن بيد الجبان اتعثرت بغمادها
ياجرح غزه بلسمك صمود وابطال الصمود
وادري جروحك نزفها تصعب على ضمادها
ياصامده لا تحتري او ترتجي منا ردود
لا تحتري منا سوى شجب لصنيع اوغادها
نستنكر وننطر فرج ياتي من الضد اللدود
مثل الجلود اللي شكت للسّوط من جلادها
كم نار ذقنا حرها ونطلب من الغرب الخمود
وشلون واللي شبها نتوسله بخمادها
والمشكله ما مشكله الا لها حبك وبنود
البيت الابيض خطته عقل اليهودي جادها
ياغزه الامه هوت لا تصدقي منها وعود
لا تحسبيها بعدها على مسير اجدادها
ياغزه المجد انتهى في غيهب عروش وحدود
عشرون والا فوقها وش فايدة تعدادها
لا تستغيثي المعتصم المعتصم وسط اللحود
لو كان يسمع صرختك يمك جيوشه قادها
ايضا ولا تترقبي لجيوش طارق والحشود
ابطالها تحت الثرى من بعد بني اعمادها
ماتو يطمنهم امل بحفاد تفعل كالجدود
ياللاسف خابت امال اجدودها بحفادها
يالصامده تحت السحاب اللي هماليله وقود
يا قاهره كل السيول اللي الهيب ازبادها
ياشاربه دم الطهر يالمة اشلاء الفهود
لا تحتري سيوف العرب اللي صدت بغمادها
يمكن يجي يوم اليهود تساندك ضد اليهود
بس اللي ما ممكن يجيك اجيوشنا وامدادها
يالصامده اكبر عمى كان السبب فيه الودود
بعض العيون اللي انعمت كان السبب مروادها
يالصامده دام المراد حقوق شعبك له تعود
ويزيل حكم المغتصب اللي شعوبك بادها
وش حد يمناكي على كسرة يسارك والزنود
وانتي يمينك والشمال مّع العدو ميعادها
يا امة الهادي صدا عزم السيوف من هالغمود
ماخجلت وجيه الرجال ابلفها بجنادها
سلام لك ياصامده يامن لكي حق الوجود
ارقي شموخ الطايله على سنام امجادها
الشاعرالفارق عبدالهادي البحيح الحويطي
يا غزة المجد
العرض المتطور
